قازاقستاننىڭ دەنساۋلىق ساقتاۋ ۆيسە-مينيسترى قىزمەتىنەن بوساتىلعان كامالجان نادىروۆتان كوروناۆيرۋس ينفەكسياسى انىقتالدى. بۇل تۋرالى دەنساۋلىق ساقتاۋ ءمينيسترى ەلجان ءبىرتانوۆ Facebook جەلىسىندە جازدى.

– كەشە ۇكىمەت قاۋلىسىمەن كامالجان تالعات ۇلى نادىروۆ باسقا جۇمىسقا اۋىسۋىنا بايلانىستى دەنساۋلىق ساقتاۋ ۆيسە-مينيسترى قىزمەتىنەن بوساتىلدى. الماتى قالاسىندا كوروناۆيرۋستىق ينفەكسيا كەڭىنەن تاراپ، جاعداي قيىنداعان سوڭ قوعامدىق دەنساۋلىق ساقتاۋ باسقارماسىنىڭ قازىرگى باسشىسى تىلەۋحان شىلدەباي ۇلى ابىلدايەۆ وتستاۆكاعا كەتۋ تۋرالى ءوتىنىش بىلدىرگەن بولاتىن. قالاداعى كوماندانى كۇشەيتۋ ماقساتىندا باسقارما باسشىسى لاۋازىمىنا ك.ت. نادىروۆتى تاعايىنداۋ جوسپارلانعان ەدى. الايدا كەشە كەشكىسىن ك.ت. نادىروۆقا كوروناۆيرۋستىق ينفەكسيا جۇقتىرعان دەگەن دياگنوز قويىلدى، ءقازىر ول ەمدەلۋ ءۇشىن اۋرۋحاناعا جاتتى، – دەپ جازدى مينيستر.

وسى جاعدايعا بايلانىستى الماتى قالاسى اكىمىنىڭ كەلىسىمىمەن ت.ش. ابىلدايەۆتىڭ وتستاۆكاعا كەتۋ تۋرالى ءوتىنىشى توقتاتىلعان.

– جالپى، الماتىداعى COVID-19-عا قاتىستى جاعداي مەملەكەت جانە قالا باسشىلىعىنىڭ ەرەكشە باقىلاۋىندا. بۇگىن تاڭعى مالىمەت بويىنشا مۇندا جالپى 678 ادامنىڭ ينفەكسيا جۇقتىرعانى انىقتالدى، سكرينينگ ناتيجەسىندە ناۋقاستاردىڭ جارتىسىنا جۋىعى مەديسينا قىزمەتكەرلەرى ەكەنى بەلگىلى بولدى. ورتالىق قالالىق كلينيكالىق اۋرۋحاناداعى ىندەتتىڭ وشاعى وقشاۋلاندىرىلدى، بارلىق پاسيەنتتەر، كوروناۆيرۋستىق ينفەكسيا دياگنوزى راستالعان قىزمەتكەرلەر قالاداعى ستاسيونارلارعا ورنالاستىرىلدى جانە ەمدەلۋدە. اتالعان اۋرۋحانانىڭ عيماراتتارى تولىق دەزينفەكسيالانادى، ستاسيونار سودان كەيىن عانا ناۋقاستاردى قابىلداۋعا كىرىسەدى، – دەپ جازدى ءبىرتانوۆ.