كوروناۆيرۋس ىندەتى باستالعالى الماتىدا 39 مىڭ پسر تەستى وتكىزىلدى. تاعى 19،5 مىڭ ەكسپرەسس-تەستىلەر ءقاۋىپ ايماعىندا جۇرگەن توپ وكىلدەرىنەن الىندى. بۇل تۋرالى اكىمدىكتىڭ باسپا ءسوز ورتالىعىندا قالانىڭ مەملەكەتتىك باس سانيتارلىق دارىگەرى جانداربەك بەكشين مالىمدەدى.

– كوروناۆيرۋستى انىقتايتىن 40 مىڭعا جۋىق ەكسپرەسس-تەست قالاعا گۋمانيتارلىق كومەك اياسىندا جەتكىزىلدى. قازىرگى كەزدە ونىڭ 19،5 مىڭنان استامى تەگىن نەگىزدە جۇرگىزىلگەن. كوروناۆيرۋس جۇقتىردى دەگەن 16 جاعداي پسر ادىسىمەن انىقتالدى. "وليمپ" كلينيكو-دياگنوستيكالىق زەرتحاناسى بەس جەدەل تەستىلەۋ پۋنكتتەرىن اشتى. ولار – تەگىن، ءبىراق تەك بەلگىلى ءبىر تۇلعالار توبىنا عانا جاسالادى. تەستىلەۋ ەلىمىزدىڭ باس سانيتارلىق دارىگەرىنىڭ بەكىتكەن قاۋلىسىنىڭ تالاپتارىنا ساي جۇرگىزىلەدى. ءبىرىنشى كەزەكتە بۇل ينفەكسيا جۇقتىرۋ ءقاۋپى جوعارى اۋماقتا جۇمىس ىستەپ جاتقان توپ وكىلدەرى، مىسالى بلوك-بەكەتتەردە جۇمىس ىستەيتىن اسكەري كونتينگەنت. بۇلاردىڭ الدىنان وتە كوپ ازاماتتار وتەدى. ياعني، ولار وتە كوپ تۇلعالارمەن قارىم-قاتىناستا جۇمىس ىستەپ جاتىر. لابوراتوريالىق ورتالىققا جاپپاي بارۋ مەن كەزەككە تۇرماس ءۇشىن ولاردىڭ جۇمىس ورىندارىندا تالداۋلار جيناۋ ماقساتىمەن كوشپەلى بريگادالار قۇرىلدى، – دەدى ج. بەكشين.

قالانىڭ باس سانيتارلىق دارىگەرى الماتىدا پسر ادىسىمەن كوروناۆيرۋسقا كۇنىنە 2700 تەستكە دەيىن الىناتىنىن ايتتى.

تەستىلەۋ جوسپارلى تۇردە، ءبىرىنشى كەزەكتە مەديسينالىق قىزمەتكەرلەر، الەۋمەتتىك-مەديسينالىق ۇيىمداردىڭ قىزمەتكەرلەرى سياقتى جۇقتىرۋ ءقاۋپى جوعارى دەگەن توپتاردا جۇرگىزىلەدى.

ولاردى تەستىلەۋ اياقتالعاننان كەيىن ساۋدا قىزمەتكەرلەرىن، كۋرەرلەردى جانە باسقا دا كاسىپتەردىڭ وكىلدەرىن تەستىلەۋ باستالماقشى. ويتكەنى، ولار قىزمەت بابىمەن كوپتەگەن ادامدارمەن بايلانىسۋدا.

قازىرگى ۋاقىتتا الماتىدا 20 مىڭ پسر تەست بار، جاقىن ارادا تاعى 30 مىڭ تەست جەتكىزىلمەكشى. پسر تەستتەرمەن جابدىقتاۋ رەسپۋبليكالىق بيۋدجەت ەسەبىنەن جۇرگىزىلەدى.