ق ر پرەمەر-مينيسترى اسقار ءماميننىڭ توراعالىعىمەن وتكەن ۇكىمەتتىڭ سەلەكتورلىق وتىرىسىندا ازىق-تۇلىك قاۋىپسىزدىگىن قامتاماسىز ەتۋ جانە تاۋار سۇيەمەلدەۋ جۇيەسىن قۇرۋ ماسەلەلەرى قارالدى، دەپ جازادى primeminister.kz.

قازاقستان ۇلتتىق تاۋار وتكىزۋ جەلىسى – كوتەرمە-تاراتۋ ورتالىقتارى كەشەنىن (كتو) قۇرۋ ارقىلى ازىق-تۇلىك قاۋىپسىزدىگىن قامتاماسىز ەتۋ مەن باعانى باقىلاۋدىڭ جاڭا دەڭگەيىنە وتپەك. وسىعان ۇقساس جۇيەلەر دامىعان ەلدەردە ءساتتى جۇمىس ىستەپ تۇر، فرانسيا، يسپانيا جانە باسقا دا مەملەكەتتەردىڭ تاجىريبەسى ەگجەي-تەگجەيلى زەردەلەندى.

ۇلتتىق تاۋار وتكىزۋ جۇيەسىن قۇرۋ جوباسى 2022 جىلعا دەيىن ءۇش كەزەڭدە ىسكە اسىرىلادى جانە 24-تەن اسا كوتەرمە-تاراتۋ ورتالىعى سالىنادى. بۇل شامامەن 4،8 ملن توننا اگروونىمدى ساقتاۋعا، وڭدەۋ مەن تاراتۋعا مۇمكىندىك بەرەدى. جاسالىپ جاتقان ينفراقۇرىلىم جينالعان جەمىس-كوكونىس ونىمدەرىنىڭ تولىق ساقتالۋىن قامتاماسىز ەتۋگە جانە شىعىندى ازايتۋعا جول اشادى. سونىڭ ناتيجەسىندە اۋىل شارۋاشىلىعى تاۋارىن وندىرۋشىلەردى ءوز ءوندىرىسىن ۇلعايتۋعا ىنتالاندىرادى. بۇگىنگى تاڭدا جەمىس-كوكونىس قويمالارىنىڭ تاپشىلىعى 70%-دى قۇرايدى.

بيىل پاۆلودار، الماتى جانە تۇركىستان وبلىستارىندا 5 كوتەرمە-تاراتۋ ورتالىعى ىسكە قوسىلادى، بۇل قوسىمشا 600 مىڭ توننا اۋىل شارۋاشىلىعى ءونىمىن ساقتاۋعا مۇمكىندىك بەرەدى.

ۇكىمەت باسشىسى بارلىق وڭىرلەردە دامىعان كوتەرمە-تاراتۋ ورتالىقتارى جەلىسىنىڭ بولۋى ماۋسىمارالىق كەزەڭدەگى ازىق-تۇلىك تاپشىلىعى ماسەلەسىن دە شەشەتىنىن، نارىقتا ءونىم جەتكىلىكتى بولسا، ونىڭ باعاسى دا وسپەيتىنىن اتاپ ءوتتى. سونىمەن قاتار، ناقتى قۇرىلعان تاۋاردى وتكىزۋ جەلىسى قاجەتسىز دەلدالداردى شەكتەي وتىرىپ، سيفرلىق تەحنولوگيالاردى ەنگىزۋ ارقىلى ءاربىر كەزەڭدە قوسىلاتىن باعانى باقىلاۋعا جول اشادى.

– كوتەرمە-تاراتۋ ورتالىقتارىن ىسكە قوسقاندا ءبىرىنشى كەزەڭنىڭ وزىندە باعا بەلگىلەۋدىڭ اشىقتىعى مەن جاڭا ءتيىمدى ساۋدا مەحانيزمدەرىنىڭ ارقاسىندا ءبىز اگرارلىق ءونىم باعاسى 25%-عا دەيىن تومەندەيدى دەپ بولجاپ وتىرمىز، – دەدى ا. مامين.

وڭىرلەردىڭ اكىمدىكتەرىنە كوتەرمە-تاراتۋ ورتالىقتارىنا جەر ۋچاسكەلەرىن ءبولىپ، ولارعا قاجەتتى ينفراقۇرىلىمدى جۇرگىزۋ، سونداي-اق جاڭا وندىرىستەردى قۇرۋعا جەكە سەكتوردى تارتۋ مەن كەڭەيتۋ مۇمكىندىگىن قاراستىرۋ تاپسىرىلدى.