قالا اكىمدىگىنىڭ باسپا ءسوز ورتالىعىندا الماتى قالاسى اكىمىنىڭ ءبىرىنشى ورىنباسارى ەرلان قوجاعاپانوۆتىڭ قاتىسۋىمەن ونلاين بريفينگ ءوتتى. وندا ول تۇرعىنداردان ءجيى كەلىپ تۇسەتىن سۇراقتارعا جاۋاپ بەردى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

الماتىلىقتار «قالانىڭ باسقا ايماعىندا تۇراتىن قارت تۋىستارعا كومەكتەسۋگە بولا ما؟» دەگەن سۇراقتى ءجيى قويادى ەكەن. قالا اكىمىنىڭ ءبىرىنشى ورىنباسارى مۇنداي جاعدايلاردا ازاماتتارعا قارت جانە كۇتىمدى كەرەك ەتەتىن تۋىستارىن كارانتين ۋاقىتىندا ءوز ۇيىنە كوشىرۋ ۇسىنىلاتىنىن جەتكىزدى. ءقازىر ەگدە جاستاعى ادامدار ەرەكشە قورعاۋدى قاجەت ەتەدى. ويتكەنى، ولاردىڭ يممۋنيتەتى ءالسىز.

– سوندىقتان قاجەت نارسەنىڭ ءبارىن ساتىپ الىپ، كارانتيننىڭ سوڭىنا دەيىن قارت ادامداردىڭ جانىندا بولۋ كەرەك، ولاردىڭ باسقالارمەن بايلانىسىن ازايتقان دۇرىس. ەگەر بۇل مۇمكىن بولماسا، قالادا مۇقتاج ادامدارعا كومەك كورسەتەتىن ەرىكتىلەر شتابى جۇمىس ىستەيدى. ەرىكتىلەر شتابىنىڭ تەلەفونى – 279-1691، – دەدى قالا اكىمىنىڭ ءبىرىنشى ورىنباسارى.

– ادامدار ۇيدەن قانشالىقتى الىس كەتكەنىن قالاي انىقتايدى؟ سەبەبى، كوپ ادامدار تىركەلگەن مەكەن-جايدا تۇرمايدى عوي» دەگەن ساۋالعا: «ءسىزدىڭ تۇراتىن جەرىڭىز بەن قوزعالاتىن جەرىڭىز اراسىنداعى قاشىقتىق ەلەكتروندى كارتا جانە قالا تۇرعىندارى كەڭىنەن پايدالاناتىن قوسىمشالار ارقىلى ولشەنەدى. تىركەۋگە كەلەر بولساق، ءسىز قازىرگى تاڭدا ناقتى تۇراتىن جەرىڭىزگە ونلاين رەجيمىندە ۋاقىتشا تىركەلە الاسىز، – دەپ جاۋاپ بەردى ەرلان توقتارحان ۇلى.