الماتى قالاسى اكىمدىگىنىڭ باسپا ءسوز ورتالىعىندا شاھار باسشىسىنىڭ ءبىرىنشى ورىنباسارى ەرلان قوجاعاپانوۆ ونلاين بريفينگ وتكىزدى. بريفينگ بارىسىندا ەرلان توقتارحان ۇلى الماتى قالاسىنىڭ تۇرعىندارى ءۇشىن ەڭ وزەكتى بولىپ تابىلاتىن ماسەلەلەرگە توقتالدى.

سونىڭ ءبىرى كارانتين جاعدايىنداعى كوشەلەر، اۋلالار مەن تۇرعىن ۇيلەردىڭ كىرەبەرىستەرى نەندەي سۇيىقتىقپەن زالالسىزداندىرىلادى؟ ادام اعزاسىنا زياندى ەمەس پە؟ قۇستار مەن يتتەر نەگە ءولىپ جاتىر؟ دەگەن ساۋالدار.

قالا اكىمىنىڭ ءبىرىنشى ورىنباسارى ول ءۇشىن ابەكتەريل، رۋبين، ناتريي ءحلوريدى سياقتى دەزينفەكسيالىق ەرتىندىلەردىڭ پايدالانىلاتىنىن ايتتى. مامانداردىڭ ايتۋىنشا، جان- جانۋارلارعا مۇنداي دەزينفەكسيالىق زاتتاردان ۋلانۋ ءقاۋپى ءتونىپ تۇرعان جوق.

– دەزينفەكسيا جۇمىستارىنا 1،0 پايىزدىق حلورلى ەرىتىندى پايدالانىلادى. قالالىق ۆەتەريانارلىق قىزمەتى كمك قىزمەتكەرلەرى قۇستارعا ءقاۋىپ كەلتىرەتىن اۋرۋلار بولماۋ ءۇشىن زەرتحانالىق زەرتتەۋلەر جاسالىپ، پوتولوگيالىق ماتەريالدارعا ىرىكتەۋ جۇرگىزگەن ەدى. ناتيجەسىندە قۇستاردىڭ بۇرىنعى مۇز ايدىنى ورنالاسقان 100 شارشى مەتر الاڭقايدان تابىلعانى بەلگىلى بولدى. قۇستار مۇز ايدىنىنان ەرىگەن سۋدى ىشكەن. ال، ول سۋدىڭ قۇرامىندا مۇزدىڭ ۇزاق ساقتالۋى ءۇشىن قولدانىلاتىن ۋلى زاتتار، ياعني حلوداگەنتتەردىڭ بولعانى سەبەپ بولىپ وتىر، – دەدى ە. قوجاعاپانوۆ.