الماتى قالاسى اكىمدىگىنىڭ باسپا ءسوز ورتالىعىندا شاھار باسشىسىنىڭ ءبىرىنشى ورىنباسارى ەرلان قوجاعاپانوۆ ونلاين بريفينگ وتكىزدى. بريفينگ بارىسىندا ەرلان توقتارحان ۇلى الماتى قالاسىنىڭ تۇرعىندارى ءۇشىن ەڭ وزەكتى بولىپ تابىلاتىن ماسەلەلەرگە توقتالدى.

– قالا ومىرىندەگى ەڭ ءبىر سۇرانىسقا يە كولىك بۇل – ارينە تاكسي ەكەندىگى بەلگىلى. كارانتين ەنگىزىلگەنگە دەيىن تاكسي شاقىرتۋعا كۇنىنە 10 مىڭنان استام ءوتىنىم قابىلدانسا، سوڭعى اپتادا ول كۇرت تومەندەگەن. ياعني شاقىرتۋ 700-گە ءتۇسىپ كەتكەن. وسىعان وراي جەدەل شتاب ەڭ بەلسەندى تاكسيلەردى قىزمەتكە تارتىپ وتىر. ولاردىڭ بارلىعى مىندەتتى شارتتاردى بۇلجىتپاي ورىنداۋلارى كەرەك، – دەدى ە. قوجاعاپانوۆ.

ماسەلەن، كولىكتەر ءاربىر شاقىرتۋلاردان كەيىن زالالسىزداندىرۋ جۇمىستارىن جۇرگىزۋگە جانە ءبىر جولاۋشىدان ارتىق الماۋعا مىندەتتى. بەلگىلى بولعانداي، قالاداعى كارانتين كەزىندە 2 مىڭ تاكسي جۇمىسقا تارتىلعان ەكەن. بريفينگتە قويىلعان ساۋالدىڭ ءبىرى اراقاشىقتىقتى ساقتاۋعا بايلانىستى بولدى. ماسەلەن، ەگەر ازىق-تۇلىك سۋپەرماركەتى 1 شاقىرىم جەردە ورنالاسسا، وعان 10 مينۋت ۋاقىتتا جەتۋگە بولا ما دەگەن ساۋال قويىلدى.

– كارانتين جاعدايىندا ەڭ قولايلىسى ۇيىڭىزگە جاقىن ورنالاسقان دۇكەن نەمەسە ءدارىحاناعا بارۋ ەكەنى داۋسىز. ەگەر ءسىزدى جاياۋ پاترۋلدەر توقتاتا قالسا، ءۇيىڭىزدىڭ ماڭايىندا دۇكەننىڭ بار-جوعىن انىقتايتىن بولادى، – دەدى اكىمنىڭ ءبىرىنشى ورىنباسارى.

سونىمەن قاتار، قالا تۇرعىندارىن مازالاپ وتىرعان شەكتەۋ شارالارىن ۇزارتۋعا بايلانىستى شەشىمنىڭ قابىلدانۋى مۇمكىن بە دەگەن ساۋالدىڭ دا جاۋابى بەرىلدى.

– جۇقپالى ىندەتتىڭ بەلەڭ الىپ بارا جاتقانىن ەسكەرىپ، شەكتەۋ شارالارىنىڭ ۇزارتىلۋى دا مۇمكىن. ماسەلەن، يتاليا كارانتين مەرزىمىن 13 ساۋىرگە دەيىن ۇزارتاتىندىعىن مالىمدەدى، – دەدى شاھار باسشىسىنىڭ ءبىرىنشى ورىنباسارى ەرلان قوجاعاپانوۆ.