باتىس قازاقستان وبلىسى دەنساۋلىق ساقتاۋ باسقارماسىنىڭ باسشىسى بولاتبەك قايۋپوۆ جۇقپالى اۋرۋلار اۋرۋحاناسىندا دارىگەرلەردىڭ تالابىنا باعىنباي جۇرگەن بىرنەشە ەمدەلۋشى بارىن ايتتى. بۇل تۋرالى قازاقپارات حابارلادى.

ب.قايۋپوۆتىڭ ايتۋىنشا، ولار پالاتالاردى ارالاپ، باسقالاردى تارتىپكە مويىنۇسىنباۋعا ۇندەپ، ۆيرۋستى تاراتا تۇسۋدە.

– بۇدان بىرنەشە كۇن بۇرىن دا وسىنداي جاعداي بولدى. وسى ەمدەلۋشىلەر وزدەرىن ساۋ ساناپ، پالاتالارىنان شىعىپ، ۇيلەرىنە كەتپەك بولدى. بالكىم، اراق تا ىشكەن بولار. مۇنداي جاعداي بۇگىن دە قايتالاندى. وسىلايشا، ولار وزدەرىنە زيان جاساپ وتىر. مۇنىڭ سەبەبى مىنادا، ەمدەلگەنىنە 14 كۇن بولىپ، جازىلۋعا جاقىنداعان ادامدار باسقالارمەن ارالاسسا، ەمدەۋ كۋرسىن قايتادان باستاۋعا تۋرا كەلەدى. ەگەر تىپ-تىنىش ەمدەلسە، 14 كۇننەن كەيىن جازىلىپ شىعار ەدى، – دەدى ب.قايۋپوۆ.

دارىگەر ولارعا ۆيرۋستىڭ قاۋىپتىلىگىن ءتۇسىندىرىپ، وسى كۇيلەرىندە ۇيلەرىنە بارماۋعا كەڭەس بەرسە دە، تۇسىنگىسى كەلمەيتىنىن اتاپ ايتتى.

– ولار وزگە ەمدەلۋشىلەر عانا ەمەس، دارىگەرلەر مەن مەدبيكەلەرگە دە اۋرۋ تاراتۋى مۇمكىن. وسى اۋرۋحانادان 8 قىزمەتكەردىڭ كوروناۆيرۋس جۇقتىرۋى ويلاندىرماي قويمايدى. ءقازىر جاعداي تىنىشتالدى. ايتسە دە اتالعان كىسىلەر قايتادان بۇلىك شىعارسا، قىلمىستىق ءىس قوزعالۋى دا مۇمكىن، – دەدى باسقارما باسشىسى.