ءۇشىنشى دۇنيەجۇزىلىك سوعىستى اقش پەن جۇڭگو باستاۋى مۇمكىن. ۇلىبريتانيانىڭ ەكس-دەپۋتاتى بەيجىڭنىڭ اسكەري شابۋىلداۋ جوسپارىن اشكەرەلەدى. بۇل تۋرالى قامشى ءتىلشىسى The New York Post گازەتىنە سىلتەمە جاساپ حابارلايدى.

بىرىككەن كورولدىكتىڭ بۇرىنعى دەپۋتاتى دجوردج گاللوۋەي "وڭتۇستىك جۇڭگو تەڭىزىندە شيەلەنىس كۇشەيىپ، جۇڭگو مەن اقش اراسىندا سوعىس باستالۋى مۇمكىن" دەپ بولجام جاسادى.

ونىڭ ايتۋىنشا، بەيجىڭ بۇرىن-سوڭدى بولماعان جانە "شەشۋشى اسكەري قادام" جاساۋى مۇمكىن. سونىڭ سالدارىنان، جۇڭگو مەن اقش اراسىندا سوعىس باستالۋى مۇمكىندىگىن ەسكەرتتى. بريتانيالىق بۇرىنعى دەپۋتاتتىڭ ويىنشا، بىرنەشە ونجىلدىقتار بويى داۋلى ايماق بولىپ كەلگەن وڭتۇستىك جۇڭگو تەڭىزىندە كەنەتتەن اسكەري قاقتىعىس "جارىلۋى مۇمكىن".

ايتا كەتەيىك، وسى اپتانىڭ باسىندا اقش اسكەري-تەڭىز كۇشتەرىنىڭ زىمىران جويعىش كەمەلەرى وڭتۇستىك جۇڭگو تەڭىزىندەگى پاراكەل ارالدارى ماڭىنداعى تەڭىزبەن ءجۇزىپ وتكەن. بەيجىڭ ول ارەكەتتەرگە نارازىلىق بىلدىرگەن.

اقش اسكەري-تەڭىز كۇشتەرىنىڭ حابارلاۋىنشا، ۆاشينگتون "حالىقارالىق زاڭداردا تانىلعان تەڭىزدەردى قولدانۋدىڭ بوستاندىقتارى مەن قۇقىقتارىن" قورعاۋعا تىرىسقان.

الايدا جۇڭگو اسكەري كۇشتەرى ۆاشينگتونعا قايتارما جاۋاپ جاسادى: جۇڭگو حالىق ازاتتىق ارمياسى اسكەري كەمەلەر مەن ۇشاقتارىن داۋلى تەڭىز ايماعىنا جىبەردى.

بەيسەنبىدە اقش اسكەري اۋە كۇشتەرىنىڭ ەكى بومبالاۋشىسىن جىبەردى.

قىتايدىڭ مەملەكەتتىك گازەتى اقش-تى "ايماققا اگرەسسيۆتى تۇردە ارالاسىپ وتىر" دەپ ايىپتادى.