الماتى قالاسى باس سانيتارلىق دارىگەرىنىڭ كەزەكتى بريفينگى ءوتتى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

الماتى قالاسىنىڭ باس سانيتارلىق دارىگەرى ج. بەكشيننىڭ حابارلاۋىنشا، وسى جىلدىڭ 30 ساۋىرىندەگى جاعداي بويىنشا مەگاپوليستە كوروناۆيرۋس ينفەكسياسىنىڭ 1028 جاعدايى تىركەلگەن. 100 مىڭ تۇرعىنعا شاققاندا اۋرۋ كورسەتكىشى 49،5 پايىزدى قۇرادى. سەگىز ادام قايتىس بولعان.

ال ەسەپ بەرۋ كەزەڭىندە كۇن سايىنعى ءوسىم 7% قۇراپ وتىر. اۋرۋ ەرەسەكتەر اراسىندا باسىم. بۇل انىقتالعان جاعدايلاردى جاس ساناتتارى بويىنشا قاراستىرسا، اتاپ ايتقاندا: 14 جاسقا دەيىنگى بالالار – 37 (3،7%)، 20-29 جاستاعىلار – 340 (34،4%) جانە 60 جاستان اسقاندار – 70 (7%).

سونداي-اق، قالانىڭ باس سانيتارلىق دارىگەرى دەزينفەكسيانىڭ ۇلكەن كولەمى جۇرگىزىلىپ، ودان ءارى كۇن سايىن 1300-گە جۋىق ءۇي ماڭىنداعى اۋماق دەزينفەكسيالاناتىنىن اتاپ ءوتتى. وسى شارالاردىڭ ارقاسىندا ينفەكسيانىڭ تارالۋى تەجەلەدى، جالپى العاندا قالاداعى 8000-عا جۋىق كىرەبەرىستى زالالسىزداندىرۋ جالعاسۋدا. مۇنداي جۇمىس ءبىزدىڭ ازاماتتارىمىزدىڭ سىرقاتتانباۋى ءۇشىن جۇرگىزىلەدى جانە بۇل ءوزىن-وزى وقشاۋلاۋ سياقتى باسقالارمەن بىرگە الدىن الۋدىڭ ەڭ ءتيىمدى جولى بولىپ تابىلادى.