الماتى قالاسى اكىمدىگىنىڭ باسپا ءسوز ورتالىعىندا قالالىق قوعامدىق دەنساۋلىق باسقارماسى باسشىسىنىڭ ورىنباسارى اسەل بيسەنبايەۆا ب ا ق وكىلدەرىنە ارناپ ونلاين بريفينگ وتكىزدى. بريفينگتە ول الەمدى ءدۇر سىلكىندىرگەن ىندەتتىڭ ءبىزدىڭ قالامىزداعى جاعدايىنا توقتالدى.

الماتىدا كارانتين باستالعاننان بەرى ىندەتتەن كوز جۇمعاندار سانى 2%-عا ازايدى. اسەل بيسەنبايەۆانىڭ ايتۋىنشا، ۆەدومستۆو باسشىسىنىڭ بۇيرىعىمەن ءولىم-جىتىمدى زەرتتەۋ جونىندەگى كوميسسيا قۇرىلدى. كوميسسيانىڭ نەگىزگى مىندەتى – كوروناۆيرۋستىق ينفەكسيانىڭ ادام ولىمىنە سەبەپ بولعانىن انىقتاۋ.

كوميسسيانىڭ قۇرامىنا قوعامدىق دەنساۋلىق باسقارماسى، تاۋارلار مەن قىزمەتتەردىڭ قاۋىپسىزدىگىن باقىلاۋ جانە ساپانى باقىلاۋ دەپارتامەنتىنىڭ وكىلدەرى، مەديسينالىق جانە بەيىندى ماماندار، مەديسينالىق ۇيىمداردىڭ باس دارىگەرلەرى كىرگەن.

رەسمي ستاتيستيكانىڭ مالىمەتتەرى بويىنشا، الماتىدا كوروناۆيرۋستىق ينفەكسيامەن كۇرەسكە باعىتتالعان كۇشەيتىلگەن ءىس-شارالاردىڭ جۇرگىزىلۋى كەزىندە ءولىم-جىتىمنىڭ ءوسىمى بولماعان. ونىڭ ۇستىنە، كورسەتكىش 100 مىڭ تۇرعىنعا شاققاندا ءبىرىنشى توقساندا 6،6%-دى قۇرادى. بۇل كورسەتكىش وتكەن جىلعا قاراعاندا 2%-عا تومەن.

– قان اينالىمى جۇيەسى اۋرۋلارىنان بولاتىن ءولىم-جىتىم بىزدە 2%-عا، قاتەرلى اۋرۋلار 5%-عا، جازاتايىم وقيعالاردان، قىسىم مەن جاراقاتتان بولعان كورسەتكىش وتكەن جىلمەن سالىستىرعاندا 41،6%-دى (وتكەن جىلى 43،8%) قۇرادى، – دەدى اسەل بيسەنبايەۆا.