جەڭىس سىيلاعان باتىرلارعا قۇرمەت ءاردايىم كورسەتىلۋگە ءتيىس.  200 مىڭ سوم نەمەسە 8 تانك. سۇراپىل سوعىسقا بارا الماعان تىل ەڭبەككەرى ەسەنعابىل بايمەندييەۆ جاۋعا قارسى شايقاسقان جاۋىنگەرلەرگە وسىلايشا قولداۋ جاساعان. بۇل تۋرالى almaty.tv حابارلادى.

ونىڭ پاتريوتتىق ءىسىن ءستاليننىڭ ءوزى جوعارى باعالاپ، ارنايى تەلەگرامما جىبەرگەن. بۇگىندە تىل ارداگەرىنىڭ بۇل قايىرىمدى قادامىن بالالارى ايتىپ، ماقتانادى.

قاراپايىم حالىقتى قارا تۇمان باسقان سول ءبىر 1941 جىلى ەر ازاماتتاردى جاسىنا قاراماي، لەك-لەگىمەن ۇرىس دالاسىنا اكەتىپ جاتتى. ەسەنعابىل بايمەندييەۆ ول كەزدە ماقتاارال اۋدانىنداعى اندرەيەۆ كولحوزىنىڭ ءتوراعاسى بولىپ جۇمىس ىستەدى. سوعىسقا اتتانىپ، شايقاسامىن دەپ اۋداندىق اسكەري كوميسارياتقا بىرنەشە مارتە بارادى. الايدا سول ءبىر سۇم ءارى سۋىق كەزدە تىلدا دا ەڭبەك مايدانى قىزا ءتۇستى.

– باسىندا سوعىسقا الماي، پارتيا كەرى قايتارعان ەكەن. وزبەكستاندا سىرداريا دەگەن ستانسيا بار. سوندا پويىزعا مىنگىزەيىن دەپ جاتقاندا، كەلىپ ماشينامەنەن ءبىزدىڭ اكەمىزدى، تاعى بىر-ەكى ادامدى قايتىپ الىپ كەتتى. ءسويتىپ جۇمىس ىستەتكەن، – دەدى تىل ارداگەرى ە. بايمەندييەۆتىڭ ۇلى توقتار بايمەندييەۆ.

وسىلايشا ەسەنعابىل اتا ەلدە قالىپ، ايانباي ەڭبەك ەتەدى. سوعىس ءورتى لاۋلاي تۇسكەن تۇستا، اسىرەسە مال شىعىنىنا جول بەرمەۋ باعىتىندا جۇمىس ىستەيدى. مال ونىمدەرىن كوبەيتەدى. ال مايدان دالاسىنا بارىپ، جاۋمەن شايقاسا الماعاندىقتان، باعىپ وتىرعان بارلىق ءتورت تۇلىگىن ساتىپ، ودان شىققان 200 مىڭ سومىن سوعىسقا جولدايدى. بۇل اقشاعا قىزىل اسكەر 8 تانك العان ەكەن. ەسەنعابىل اتانىڭ وسى پاتريوتتىق ءىسى سول كەزدەگى گازەتتەردە جازىلادى. جومارتتىعىن ءتىپتى ءستاليننىڭ ءوزى باعالاپ، ارنايى تەلەگرامما جىبەرەدى.    

– 1943 جىلى مايدانعا جۇرتتار جانىن اياماعاندا مەن نەعىپ ايايمىن دەپ ۇيدەگى مالدىڭ ءبارىن ساتىپ،  قورجىندى ءبىر قاپ  اقشاعا تولتىرىپ، 30 شاقىرىم جەرگە اپارىپ تاپسىردىق دەيدى. 1944 جىلى حات كەلگەن ول جاقتان. «اعا، ءسىزدىڭ بەرگەن تانكىلەرىڭىزبەن بەرلينعا بارا جاتىرمىز، گيتلەردى  جويامىز» دەپ جازىلعان. ول حاتتى جوعالتىپ الىپ، كەيىن ماعان  وسىنداي حات  بارىن ايتقان ەدى.  كەيىن ستاليننان العىس حات كەلدى. سوعىسقا وسىلاي كومەكتەسكەن، – دەدى تىل ارداگەرى ە. بايمەندييەۆتىڭ ۇلى توقتار بايمەندييەۆ.

سوعىستان كەيىن ەسەنعابىل بايمەندييەۆ زاڭ مەكتەبىن ءتامامداپ، كەلەس اۋدانى اباي اۋىلىنداعى سوتتا 5 جىلداي ەڭبەك ەتتى. كەيىن قايتىپ كولحوز ءتوراعاسى قىزمەتىنە ورالىپ، زەينەتكە دەيىن جۇمىس ىستەگەن. ارداگەر 80 جاسقا كەلگەندە ومىردەن وزعان. ەندى ونىڭ ەرلىگىن ارتىندا قالعان ەكى بالاسى بالالارى مەن نەمەرە-شوبەرەلەرىنە ايتىپ وتىر.