ۇوس اردەگەرى يبات جۇمايەۆ 1917 جىلدىڭ 18 ساۋىرىندە بۇرىنعى جىمپيتى اۋدانى، ساروي سەلوسىندا دۇنيەگە كەلگەن.  ەڭبەك جولىن قازاقستان اۋىل كەڭەسىندە باستاۋىش سىنىپ ءمۇعالىمى بولىپ باستاعان ول سوعىسقا دەيىن ءتۇرلى قىزمەتتەردى اتقارادى، دەپ اlmaty.tv مالىمدەدى.

1942 جىلدىڭ 25 شىلدەسىندە قىزىل اسكەر قاتارىنا الىنعان. ۇيىمداستىرۋشىلىق قابىلەتىمەن بىردەن كوزگە تۇسكەن ول سوعىسقان جەرلەرىندە بولىمشە كومانديرى، ۋچاستوك كومەندانتى، ۆزۆود كومانديرىنىڭ ورىنباسارى بولعان.  

ۆورونەج فرونتىندا 237-اتقىشتار ديۆيزياسى، 524-پۋلەمەت باتالونى ءبولىمى، 2-پۋلەمەت روتاسى كومەكشىسى بولعان ول اعا لەيتەنانت مالكوۆتىڭ ۇسىنىسىمەن «قىزىل جۇلدىز» وردەنىنە ۇسىنىلىپ، 1943 جىلى ماراپاتتالعان.  

مالكوۆتىڭ كەلتىرگەن سيپاتتاماسى بويىنشا 1943 جىلدىڭ 5 اقپانىندا يبات جۇمايەۆ كومەكشىلىك ەتەتىن روتاعا كۋرسك وبلىسىنىڭ جوعارى كلەششەنكا اۋىلىنان مارينو سەلوسىنا شىعۋ جانە وسى جولداعى قارسىلاستارعا سوققى بەرۋ تاپسىرىلادى. ۇرىستى باستاعان ساتتە قاسىنداعى ءبىرىنشى ءنومىرلى جاۋىنگەر جارالانىپ، جولداس جۇمايەۆ تەز ارادا پۋلەمەتتى قولىنا الىپ، قارسىلاستارعا وق اتقان ساتىندە بىردەن 15 نەمىستىڭ كوزىن جويادى. جانە فاشيستەردىڭ العا جىلجۋىنا مۇمكىندىك بەرمەيدى. وسى سوعىستىڭ ەكىنشى كۇنىندە  سەننوە اۋىلىندا ۆزۆود قاتارىنان العا ءبىرىنشى بوپ شىعىپ، بەس نەمىستى جەر جاستاندىرادى. ال اقپاننىڭ توعىزىنشى كۇنى ەفراسيموۆكا سەلوسىن الۋ بارىسىندا ارداگەر جۇمايەۆ قارسىلاستارىنىڭ وتتى بوشكەلەرىنىڭ كوزىن جويىپ،  سول جەردە ون نەمىستى اجال اۋىلىنا اتتاندىرعان (www.podvignaroda.ru سايتىنان الىنعان مالىمەت).

يبات جۇمايەۆ سوعىستا ءتورت جىلىن وتكىزىپ، كەلگەننەن كەيىن سوۆحوزدىڭ جۇمىستارىنا ارالاسادى. اۋىل شارۋاشىلىعى سالاسىندا جەتىستىكتى ەڭبەك ەتىپ، جوعارى ناتيجەلەر كورسەتكەنى ءۇشىن العىس حاتتارمەن ماراپاتتالادى، «ەڭبەك ەرى» اتانادى. الايدا ءوزى كەلگەننەن كەيىن ۇرپاقتارىنا سوعىس تۋرالى كوپ اشىلىپ ايتا بەرمەگەن، ءسويتىپ ارداگەردىڭ كوپتەگەن ەرلىگى جۇمباق كۇيىندە قالىپتى.