جىلدا باتىرلاردىڭ رۋحىنا تاعزىم جاسالىپ، ەكىنشى دۇنيەجۇزىلىك سوعىسقا قاتىسقان جاۋىنگەرلەردى ارداقتاپ، ۇلىقتايتىن ۇلى كۇندە الماتىداعى «داڭق» مەموريالى العاش رەت بوس قالدى. بۇل تۋرالى almaty.tv حابارلادى.

ەلگە تونگەن پاندەميا كەسىرىنەن بەيبىت كۇننىڭ بەلگىسىنە اينالعان الاۋعا بيىل كەلىپ ءتاۋ ەتۋگە تىيىم سالىنعان. دەسە دە وتان ءۇشىن وتقا تۇسكەن باتىرلار ەرلىگى ەل ەسىندە ماڭگى قالادى.  

بەيبىت شەرۋگە قاتىسۋشىلار وسىندا، ياعني 28 پانفيلوۆشىلار ساياباعىنا كەلىپ، ماڭگىلىك الاۋعا گۇل شوقتارىن قويادى. ءبىراق بۇگىن مۇندا دا جان بالاسى تابىلمادى. جالپى، ماڭگىلىك الاۋ العاش رەت 1975 جىلى جاعىلعان. ول جارقىن بولاشاق پەن ەرلىكتىڭ سيمۆولى بولىپ ءالى دە لاۋلاپ تۇر.

جاۋتاڭداپ قاراپ دالا تۇر،

كوز جاسىن ءسۇرتىپ جاڭا ءبىر.

حابارسىز ۇلىن سۇراۋعا،

جولىڭدى توسىپ انا ءجۇر.

قانشا ءۇيدىڭ ۇرلاپ ادامىن،

قانشا ۇيدە ءسونىپ قالدى وتتار.

كوردىڭ بە ۇلىن انانىڭ،

سوعىستان قايتقان سولداتتار؟

قازاقتىڭ ءبىرتۋار اقىنى عافۋ قايىربەكوۆ بۇل ولەڭ جولدارىمەن سۇراپىل سۇم جىلداردىڭ كورىنىسىن ءبىر ءسات تە بولسا كوز الدىڭا اكەلەدى. وتان ءۇشىن جان الىسىپ، جان بەرگەن قانشا باتىر قان مايداندا قىرشىن بولدى. قانشاۋى ۇرىس دالاسىنا ءسىڭىپ سول كۇيى وشارسىز كەتتى... بۇگىنگىدەي قوي ۇستىنە بوزتورعاي جۇمىرتقالاعان كۇنگە جەتۋ ءۇشىن سان بوزداقتىڭ تاعدىرى سارپ ەتىلدى.

ساياباقتا ەكىنشى دۇنيەجۇزىلىك سوعىستا كوپ پايدالانىلعان «كاتيۋشا» رەاكتيۆتى ارتيللەريا كولىگى تۇر. بۇگىندە 96 جاسقا تاياعان باتىر جاڭبىر كەرىمقۇلوۆ سۇم سوعىستا وسى كولىكتىڭ زەڭبىرەگىن وقتاۋشى بولىپتى. 1942 جىلى ارىس قالاسىندا ارمياعا شاقىرىلىپ، رەسەيدىڭ گوركيي قالاسىنا مايدانعا اتتانادى. ول كەزدە جاڭبىر اتا نەبارى 18-دە بولعان. جاس جاۋىنگەر نەمىستەرگە قارسى ۇرىستا دنەپردەن ءوتىپ، اۆستريادان ءبىر-اق شىقتىم دەيدى.

– ۋكراينانى تولىق باسىپ وتتىك. ودان كەيىن مولدوۆيانى باسىپ وتتىك، رۋمىنيانىڭ شەتىن باسىپ، بولگارياعا باردىق. بولگاريادان ۆەنگرياعا باردىق. بۋداپەشتتى الدىق. مەدالىم دا بار، مىنە. ۆەنگريادان شىعىپ، اۆستريا ەلىنە باردىق. ول گيتلەردىڭ تۋعان جەرى ەكەن. سول جەردە سوعىستى 1945 جىلى 8 مامىردا كەشقۇرىم بىتىردىك، - دەيدى ۇلى وتان سوعىسىنىڭ ارداگەرى جاڭبىر كەرىمقۇلوۆ.

بۇگىندە بەيبىت ءومىر ءسۇرىپ وتىرعان جاڭبىر قاريا 2 ۇلدان، 4 نەمەرە، 6 شوبەرە ءسۇيىپ وتىر. ول ەندىگى جەردە كەلەر ۇرپاق سوعىس كورمەي، جارقىن ءومىر سۇرسە دەپ تىلەيدى.

9 مامىر – جەڭىس دەپ جاريالاندى. سوعىس ءبىتتى. سودان بەرى 75 جىل ءوتتى. مايداننان تەك جاۋىنگەرلەردىڭ داڭقى، باعا جەتپەس ەرلىگى، ەستەلىكتەرى مەن مىنا بەيبىت، مامىراجاي كۇن قالدى. قانداي ءقاۋىپ تونسە دە، قانداي كەسەل كەلسە دە ەلىن قورعاعان باتىرلاردىڭ ەرلىگى ۇرپاقتان ۇرپاققا ناسيحاتتالىپ، جالعاسا بەرمەك. سۇراپىل سوعىستا جاۋعا كەۋدە توسقان ءاربىر جاۋىنگەر حالىق جادىندا. ولاردىڭ ەرلىگى، باتىلدىعى ەل ەسىنەن ۇمىتىلمايدى.