الماتىداعى بارلىق مەشىت جينالىپ ماقتاارالدىقتارعا قاجەتتى زاتتار تيەلگەن 15 توننا گۋمانيتارلىق كومەك جولدادى. بۇل تۋرالى almaty.tv حابارلادى.

جىبەرىلگەن جۇكتىڭ ىشىندە ازىق-تۇلىك ونىمدەرى، كورپە-جاستىق، كيىم-كەشەك بار. يمامدار قايىرىمدى ءىس جاساۋعا مەشىتكە كەلگەن جانى جومارت جاماعات، ەرىكتىلەر مەن كاسىپكەرلەر كومەك كورسەتتى دەپ وتىر. سوزدەرىنشە، زاتتار ەسكى ەمەس، جاڭا. اكەلگەن تاۋاردىڭ جالپى قۇنى 6 ميلليون تەڭگە تۇرادى. كومەك كوپكە از بولسا، كەيىنىرەك تاعى يگى ءىستى قولعا الۋعا نيەتتى.

– ءبىز ماقتارالداعى جاعداي ءبىرقالىپقا كەلگەنشە، جاماعاتتى، الماتى قالاسىنىڭ تۇرعىندارىن، اتاپ ايتقاندا، مەشىتكە كەلىپ جۇرەتىن تۇرعىندارىن ۇيىمداستىرۋدى جالعاستىرامىز. ءبىز توقتامايمىز، – دەدى الماتى قالاسى ورتالىق مەشىتتىڭ باس يمامى ەركىنبەك شوقاي.

ودان بولەك، الماتى مەشىتتەرى ماقتاارالدىقتارعا قارجىلاي قولداۋ كورسەتۋدى كوزدەيدى. ول «زەكەت» قورى ارقىلى اۋدارىلاتىن بولادى. قارجى 14 مامىر قولدارىنا تيەدى. ال گۋمانيتارلىق كولىك تيەلگەن كولىك تۇركىستان وبلىسىنا ەرتەڭ جەتەدى.

– بۇل بۇكىل قازاقتىڭ باسىنا كەلىپ تۇرعان سىناق. وسىنداي جاعدايدا ءبىز ءبىرىمىزدىڭ جانىمىزدان تابىلۋىمىز كەرەك. پايعامبارىمىز حاديسىندە: «كىمدە كىم قيىن جاعدايدا ءوزىنىڭ باۋىرىنىڭ جانىنان تابىلىپ، وعان كومەكتەسەتىن بولسا، اللا تاعالا قامقورلىق تانىتادى»، – دەپ ايتادى. مىنە، سوندىقتان قازاقستان مۇسىلماندارى ءدىني باسقارماسىنىڭ ءتوراعاسى باس ءمۇفتي ناۋرىزباي قاجى تاعان ۇلىنىڭ باستاماسىمەن ءقازىر رەسپۋبليكادا ارنايى ماقتاارالداعى ءبىزدىڭ باۋىرلارىمىزعا كومەك  جينالىپ جاتىر،  – دەدى الماتى قالاسى ورتالىق مەشىتتىڭ باس يمامى ەركىنبەك شوقاي.