مەملەكەت باسشىسى قاسىم-جومارت توقايەۆ كارانتين شەكتەۋلەرىنە قاتىستى جاساعان مالىمدەمەسىندە «جۇمىسپەن قامتۋ جول كارتاسى» باعدارلاماسىن جۇزەگە اسىرۋعا 1 تريلليون تەڭگەگە جۋىق قارجى بولىنگەنىن اتاپ ءوتتى.
– بۇل – قوماقتى قاراجات. ونى شاعىن بيزنەستى نەسيەلەۋگە دە پايدالانۋعا بولادى. سونىڭ ءبارى قۇزىرلى ورىنداردىڭ باقىلاۋىندا بولىپ، تولىعىمەن ماقساتقا ساي جۇمسالۋعا ءتيىس. وسى كۇردەلى كەزەڭدە قارجىلاندىرىلىپ جاتقان جوبالار ارقىلى ەڭ الدىمەن جاڭا جۇمىس ورىندارىن اشۋ قاجەت. بۇعان جۇمىسشىلاردى بارىنشا كوپتەپ تارتۋ كەرەك. ۇنەمى ەكونوميكالىق تابىس اكەلەتىن نەمەسە ادامي كاپيتالدى دامىتاتىن باستامالار قولعا الىنۋى قاجەت، – دەدى توقايەۆ.
سونىمەن قاتار مەملەكەت باسشىسى مەكتەپ، اۋرۋحانا جانە باسقا دا نىساندار سالىنىپ، جاڭعىرتۋ جۇمىستارى جۇرگىزىلۋگە ءتيىس ەكەندىگىن اتاپ ءوتتى.
– بىركەلكى نىسانداردىڭ ءار ايماقتاعى قۇنى وتە الشاق بولۋىنا جول بەرمەۋ اسا ماڭىزدى. وكىنىشكە قاراي، مۇنداي جاعداي بىزدە كوپ كەزدەسەدى. جۇزەگە اسقان جوبالاردىڭ الەۋمەتتىك-ەكونوميكالىق تيىمدىلىگىنە تالداۋ جاسالادى، – دەدى قاسىم-جومارت توقايەۆ.
پىكىر قالدىرۋ