جەرسەرىكتەن تۇسىرىلگەن سۋرەتتەردە وڭتۇستىك جۇڭگو تەڭىزىنىڭ سولتۇستىگىندە ورنالاسقان ستراتەگيالىق ارالدارداعى فايەر كرەست ريفىندە جۇڭگو اسكەري كۇشتەرىنىڭ كۇتپەگەن قوزعالىسى بايقالعان. بۇل تۋرالى قامشى ءتىلشىسى بريتانيالىق Daily Express باسىلىمىنا سىلتەمە جاساپ حابارلايدى.
"دجەين اقپاراتتىق توبى" دەپ اتالاتىن قورعانىس بارلاۋ توبى "بۇل – جۇڭگو ازاتتىق ارمياسى ريفتى اۋە كۇشتەرى وپەراسياسىنىڭ بازاسى رەتىندە قولدانا باستاعانىنىڭ ءبىر بەلگىسى بولۋى مۇمكىن" دەپ ەسكەرتتى.
دجەين اقپاراتتىق توبىنىڭ نەگىزگى ساراپشىسى شون و'كوننوردىڭ ايتۋىنشا، وندا كەمىندە ءۇش باقىلاۋ ۇشاعى ءۇشىن ورىن بار، ال باسقا ۇشاقتار اشىق جەرگە قونا الادى.
Daily Express-تىڭ اقپاراتىنشا، جۇڭگو كورشى ەلدەردىڭ نارازىلىعىنا قاراماستان، حالىقارالىق داۋلى سۋلارداعى جاساندى ريفتەر قۇرىلىسىن باستاپ، اياقتاۋعا بەل بۋعان.
ايتا كەتەيىك، سوڭعى كەزدەرى داۋلى ايماققا قاتىستى اقش وداقتاستارى مەن بەيجىڭ اراسىندا شيەلەنىس كۇشەيە ءتۇستى. ۆاشينگتون ءبىر ايدىڭ ىشىندە ەكى رەت سوعىس كەمەلەرى مەن اسكەري ۇشاق تاسۋشى كەمەلەرىن ايماققا جىبەرگەن.
ال، بىرنەشە كۇن بۇرىن اقش يادرولىق بومبالاۋشى ۇشاقتارىن ءۇندى-تىنىق مۇحيتى اسپانىنا جىبەردى. ۆاشينگتوننىڭ بۇل ارەكەتىن حالىقارالىق ساراپشىلار "بەيجىڭگە اشىق قىر كورسەتۋ" دەپ اتادى.
پىكىر قالدىرۋ