الماتى اكىمى باقىتجان ساعىنتايەۆ قالادا بلوكبەكەتتەر 1 ماۋسىمعا قاراعان ءتۇنى الىناتىنىن مالىمدەدى. بۇل تۋرالى Instagram پاراقشاسىندا جازدى.
– 1 ماۋسىمعا قاراعان ءتۇنى قالانىڭ پەريمەترى بويىنشا ورنالاسقان بلوك-بەكەتتەردى الامىز. تج رەجيمى كەزىندە بۇل بەكەتتەر قالادان شىعۋ جانە قالاعا كىرۋدى شەكتەدى. بۇل – كوروناۆيرۋستىڭ تارالۋىن توقتاتۋ ءۇشىن قاجەت بولدى. بارلىق پوليسيا، سانيتارلىق قىزمەت، فيتو- جانە ۆەتباقىلاۋ قىزمەتكەرلەرىنە، اۋداندىق اكىمدىكتەر مەن ۇلتتىق گۆارديا، قورعانىس مينيسترلىگىنىڭ اسكەري قىزمەتشىلەرىنە العىسىمدى بىلدىرەمىن. وسى 2،5 ايدىڭ ىشىندە سىزدەر تاۋلىك بويى قىزمەت ەتىپ، جۇكتەلگەن مىندەتتى ابىرويمەن اتقاردىڭىزدار، – دەدى قالا اكىمى.
ونىڭ ايتۋىنشا ەلدەگى جانە قالاداعى جاعدايدىڭ تۇراقتانۋى شەكتەۋلەردى الۋعا مۇمكىندىك بەرگەن.
– بۇل رەتتە بارلىق كاسىپورىندار مەن ۇيىمداردا سانيتارلىق قاۋىپسىزدىك كۇشەيتىلىپ، قاۋىپسىزدىككە باسىمدىق بەرىلدى. ۇيلەرگە، اۋلا الاڭدارى مەن كوشەلەردى زالالسىزداندىرۋ جۇرگىزىلۋدە. بەلگىلەنگەن تارتىپكە باعىنىپ، سانگيگيەنا مەن الەۋمەتتىك قاشىقتىقتى ساقتاپ، قورعانىس بەتپەردەلەرىن كيىپ جۇرۋگە شاقىرامىن. بۇل قازىرگى ءومىردىڭ قالىپتى نورماسىنا اينالۋى ءتيىس. ءوزىڭىزدى جانە جاقىندارىڭىزدى قورعاڭىز!، – دەپ جازدى ساعىنتايەۆ.
