الماتى وبلىسىندا № 4 بلوكبەكەتتە جول-كولىك وقيعاسى سالدارىنان قايتىس بولعان داستان ءابدىقانوۆتىڭ اناسى جاناتگۇل ءابدىروۆا پرەزيدەنت قاسىم-جومارت توقايەۆتان ۇلىنىڭ ولىمىنە قاتىستى تەرگەۋدى قاداعالاۋدى سۇراپ، Instagram پاراقشاسىندا جازبا جاريالادى.
– مەن قىزمەت بابىندا قازا بولعان داستان ابدىقانوۆتىڭ اناسىمىن. داستان 26 جاسىندا ەلى مەن وتانى الدىندا ادال قىزمەت ەتىپ ءجۇرىپ، كىسى قولىنان قازا بولدى. الەۋمەتتىك جەلىدەن كەلىنىم دينارا كۇيەۋىنىڭ ولىمىنە كىنالى ازات ازاماتوۆتىڭ سۋرەتىن كورگەندە بىردەن تانىعان. سەبەبى ول كۇيەۋى جۇمىستا بولعان ۋاقىتتا ۇنەمى سويلەسىپ وتىرعان، ونىڭ كىممەن بىرگە سمەنگە تۇسەتىنىن جاقسى بىلگەن. "قىلمىسكەردىڭ پوليسيادا ءالى دە جۇمىس ىستەيتىنىن، جەلىدە جالعان اقپارات تارالىپ جاتقانىن، تەك شىندىقتى ايتىڭىزدار" دەپ جازعانىن راستايمىن. اكەسى تىلشىلەرگە كەلىنىمەن سويلەسپەي تۇرىپ، ءوز ويىمەن كەلىنىم ەشقانداي جازبا قالدىرعان جوق دەپ سۇقبات بەرگەن. شىندىعىندا كەلىنىنىڭ جازباسى تۋرالى بىلمەگەن. ءبىزدىڭ بىر-بىرىمىزبەن اڭگىمەلەسىپ، جەلى قاراپ، تالقىلاۋعا جاعدايمىز بولعان جوق، – دەپ جازدى جاناتگۇل ءابدىروۆا.
سونداي-اق، ول ەل پرەزيدەنتىنە ۇندەۋ جاسادى.
– مەن ۇلىمنىڭ ابىرويىنا نۇقسان كەلمەۋىن جانە قىلمىسكەردىڭ ءادىل، زاڭ تالاپتارىنا ساي، قاتاڭ جازالانۋىن سۇرايمىن. بۇل اسا قايعىلى ءىستىڭ اق قاراسىن انىقتاپ، قىلمىسكەردىڭ ءادىل جازاسىن الۋىن تالاپ ەتەمىن. مەن ەشكىمگە سەنبەيمىن. قۇرمەتتى پرەزيدەنت قاسىم-جومارت كەمەل ۇلى توقايەۆ مىرزا، وسى ءىس تىكەلەي ءوز باقىلاۋىڭىزدا بولىپ، قىلمىسكەر ءادىل جازاسىن الادى دەپ سەنەمىن، – دەدى اناسى.
ەسكە سالا كەتەيىك، 25 مامىر كۇنى تاڭعا جۋىق № 4 بلوكپوستا BMW جۇرگىزۋشىسى ماس كۇيىندە بەتون قورشاۋعا سوعىلىپ بارىپ، ينەرسيامەن پاترۋلدىك پوليسيا كولىگىن سوققان. جول-كولىك وقيعاسىنان ەكى پوليسيا قىزمەتكەرى كوز جۇمعان بولاتىن.
پىكىر قالدىرۋ