الماتىدا 20-21 ماۋسىمدا المالى اۋدانىندا 60-تان اسا ساۋدا جانە ويىن-ساۋىق ورنى، 50 سپورت ورتالىعى مەن 20 سكۆەر جابىلادى، دەپ حابارلادى قالا اكىمدىگىنىڭ باسپا ءسوز قىزمەتى.

اتالعان نىساندار ەلدە ەپيدەميولوگيالىق جاعدايدى تۇراقتاندىرۋ ماقساتىندا ەنگىزىلگەن شەكتەۋ شارالارىمەن بايلانىستى جابىلادى. اۋدان اكىمى بەكقالي تورعايەۆتىڭ ايتۋىنشا، ەكى كۇن ىشىندە ۋاقىتشا جۇمىسىن توقتاتقان وبەكتىلەردە اۋقىمدى سانيتارلىق ءىس-شارالار وتكىزىلەدى. ال قوعامدىق ورىنداردا تۇرعىنداردىڭ جيىلماۋىن ءتارتىپ ساقشىلارى قاداعالايتىن بولادى.

– المالى اۋدانىندا شەكتەۋ شارالارىنا بايلانىستى ءبىرقاتار نىساندار ۋاقىتشا جابىلادى. ول پانفيلوۆ بويىمەن ورنالاسقان جۇرگىنشىلەر كوشەسى، سونداي-اق، جىبەك جولى كوشەسىندەگى اربات دەمالىس ورنىنا دا اۋدان تۇرعىندارىنىڭ كەلۋىنە رۇقسات ەتىلمەيدى، – دەدى المالى اۋدانىنىڭ اكىمى بەكقالي تورعايەۆ.

سونداي-اق، اۋقىمدى دەزينفەكسيا جۇمىستارى شەكتەۋ شارالارى قويىلعان بارلىق اۋداندا جاسالماق. تەك جەتىسۋ اۋدانىنىڭ وزىندە سانيتارلىق وڭدەۋ 20 بازار، 10 سۋپەرماركەت جانە 15 فيتنەس-ورتالىقتا جۇرگىزىلەدى. ال، ناۋرىزباي اۋدانىندا دەمالىس كۇندەرى ءىرى 2 ساياباق پەن 3 بازار، ساۋدا ۇيلەرى مەن ىلە الاتاۋ ۇلتتىق پاركىنىڭ ماڭايى قالا تۇرعىندارى ءۇشىن جابىلادى. بۇل تۋرالى ناۋرىزباي اۋدانى اكىمىنىڭ ورىنباسارى باعلان داندىبايەۆ ونلاين-بريفينگتە حابارلادى.

– ناۋرىزباي اۋدانىندا «بارلىق»، «تاۋ سامالى» جانە «اق بۇلاق» بازارلارىنىڭ جۇمىسى توقتاتىلادى. ساۋدا ۇيلەرى جانە «سابىرجان»، «بەككەر» سەكىلدى ۇلكەن سۋپەرماركەتتەر جابىلادى. سونداي-اق، 6 فيتنەس ورتالىقتاردىڭ جۇمىسىنا دا شەكتەۋ قويىلادى، – دەدى ناۋرىزباي اۋدانى اكىمىنىڭ ورىنباسارى باعلان داندىبايەۆ.