«سق-فارماسيا» ج ش س باسقارما ءتوراعاسى مەن «الەۋمەتتىك مەديسينالىق ساقتاندىرۋ قورى» كەاق باسقارما ءتوراعاسى قىزمەتىنەن بوساتىلدى. بۇل تۋرالى دەنساۋلىق ساقتاۋ مينيسترلىگىنىڭ رەسمي سايتى حابارلادى.

"مەملەكەت باسشىسىنىڭ قاتىسۋىمەن وتكەن قازاقستان رەسپۋبليكاسى ۇكىمەتىنىڭ بۇگىنگى كەڭەيتىلگەن وتىرىسىنىڭ قورىتىندىسى بويىنشا:

قازاقستان رەسپۋبليكاسى دەنساۋلىق ساقتاۋ ءمينيسترىنىڭ 2020 جىلعى 10 شىلدەدەگى بۇيرىعىمەن بەرىلگەن ءوتىنىش نەگىزىندە جانە قازاقستان رەسپۋبليكاسىنىڭ پرەمەر-مينيسترىنىڭ كەلىسىمى بويىنشا «سق-فارماسيا« جشس-نىڭ باسقارما ءتوراعاسى ب.ش. ءشارىپ قىزمەتىنەن بوساتىلدى.

ق ر دەنساۋلىق ساقتاۋ ءمينيسترىنىڭ 2020 جىلعى 10 شىلدەدەگى بۇيرىعىمەن بەرىلگەن ءوتىنىش نەگىزىندە «الەۋمەتتىك مەديسينالىق ساقتاندىرۋ قورى« كەاق باسقارما ءتوراعاسى ا.ن. جۇماعۇلوۆ قىزمەتىنەن بوساتىلدى" دەلىنگەن حابارلامادا.

ەسكە سالا كەتسەك، مەملەكەت باسشىسى قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن بۇگىنگى وتىرىسىندا ءمامس قورى مەن «سق فارماسيا» باسشىلارىن جۇمىستان شىعارۋدى تاپسىرعان بولاتىن.

– تۋىنداعان قيىندىققا كىنالىلەردىڭ بارىنە قاتىستى تەرگەۋ جۇرگىزۋ كەرەك. جاۋاپكەرشىلىككە تارتقان دۇرىس. ءمامس قورى مەن «سق فارماسيا» باسشىلارى جۇمىستان شىعارىلسىن. كەرەك بولسا تەرگەۋ جۇرگىزگەن ءجون، – دەدى قاسىم-جومارت توقايەۆ.

– كەيىنگى كەزدە مىندەتتى الەۋمەتتىك مەديسينالىق ساقتاندىرۋ قورىنىڭ اينالاسىندا ءارتۇرلى اڭگىمە ءورشىپ كەتتى. مەنىڭشە ونىڭ باسشىلىعىنا ىسكەرىرەك ءارى جاۋاپتىراق ادامدى قويۋ كەرەك، – دەدى پرەزيدەنت.