قازاقستان دەنساۋلىق ساقتاۋ مينيسترلىگى وتكەن تاۋلىكتە 1708 ادامنان كوروناۆيرۋس انىقتالعانى تۋرالى حابارلادى.
ول ناۋقاستاردىڭ 1010-ى كلينيكالىق بەلگىلەرى جوق تاسىمالداۋشى. بۇل – سوڭعى 20 كۇندەگى تاۋلىك ىشىندەگى ستاتيستيكالاردىڭ ەڭ جوعارىلارىنىڭ ءبىرى.
ايماقتار بويىنشا تاۋلىكتەگى ەپيدەميولوگيالىق جاعداي تومەندەگىدەي (جالپى/سيمپتومسىز):
نۇر-سۇلتان قالاسى - 120 / 65
الماتى قالاسى - 223 / 102
شىمكەنت قالاسى - 80 / 50
اقمولا وبلىسى - 34 / 22
اقتوبە وبلىسى - 87 / 54
الماتى وبلىسى - 109 / 76
اتىراۋ وبلىسى - 243 / 173
شىعىس قازاقستان وبلىسى - 154 / 95
جامبىل وبلىسى - 68 / 53
باتىس قازاقستان وبلىسى - 95 / 49
قاراعاندى وبلىسى - 120 / 67
قوستاناي وبلىسى - 65 / 40
قىزىلوردا وبلىسى - 61 / 31
ماڭعىستاۋ وبلىسى - 76 / 69
پاۆلودار وبلىسى - 59 / 16
سولتۇستىك قازاقستان وبلىسى - 56 / 21
تۇركىستان وبلىسى - 58 / 27
ايماقتار اراسىندا ۆيرۋستىڭ تارالۋى جونىنەن اتىراۋ ءبىرىنشى ورىندا تۇر. وبلىستا 7393 كۆي دەرەگى تىركەلدى. ەڭ تومەنگى كورسەتكىش قوستاناي وبلىسىندا. ول جاقتا 1500 ادامنان ۆيرۋس انىقتالعان.
ەل بويىنشا كۆي جۇقتىرعانداردىڭ جالپى سانى – 56455. وسى ۋاقىتقا دەيىن 32 500 ادام ىندەتتەن ايىقسا، 264 ادام قايتىس بولعان. دەنساۋلىق ساقتاۋ مينيسترلىگى قايتىس بولعاندار تۋرالى دەرەكتى اپتاسىنا ءبىر رەت حابارلاۋعا كوشكەن. سوڭعى دەرەكتە 30 ماۋسىم مەن 6 شىلدە ارالىعىنداعى جاعدايلار حابارلاندى. ول كەزدە 76 ادام كوروناۆيرۋستان كوز جۇمدى دەلىنگەن.
قازاقستاندا سونداي-اق پنيەۆمونيا ىندەتى ءورشىپ تۇر. سوڭعى كۇندەرى ەلدە بۇل اۋرۋدان قايتىس بولعاندار تىم كوبەيگەن. قاراپايىم ادامداردان باستاپ، ونەر جانە مادەنيەت سالاسىنىڭ وكىلدەرى، لاۋازىم يەلەرى، دارىگەرلەر وسى سىرقاتتان كوز جۇمىپ جاتىر.
قازاقستاندىق جانە شەتەلدىك ماماندار پنيەۆمونيا شىن مانىندە كوروناۆيرۋس ەكەنىن مالىمدەگەن. الايدا بيلىك بۇل جاعدايدى كۆي-دان ءبولىپ قاراستىرىپ جاتىر.
قازاقستاندا پنيەۆمونيادان كوز جۇمعانداردىڭ ناقتى سانى جاريالانباعان. تەك وتكەن 6 ايداعى جاعداي تۋرالى كەلتىرىلگەن سيفرلار ءارتۇرلى. دەنساۋلىق ساقتاۋ ءمينيسترى الەكسەي سوي 9 شىلدەدە وتكەن بريفينگتە سوڭعى التى ايدا 1 172 ادامنىڭ وسى دەرتتەن كوز جۇمعانىن ايتقان. ال 3 شىلدەدە قازاقستاننىڭ باس سانيتار دارىگەرى ايجان ەسماعامبەتوۆا ەلدە سوڭعى جارتىجىلدىقتا پنيەۆمونيادان 1 772 ادام قايتىس بولعانىن مالىمدەگەن.
پىكىر قالدىرۋ