ىشكى ىستەر مينيسترلىگى اقتاۋ قالاسىندا ادام كوپ جيىلعان جانازاعا قاتىستى تەكسەرىس جۇمىستارىن باستادى. بۇل تۋرالى مينيسترلىكتىڭ باسپا ءسوز قىزمەتى حابارلادى.
ءىىم مالىمەتىنشە، ماڭعىستاۋ وبلىستىق پوليسيا دەپارتامەنتى ءتيىستى شارالاردى دەر كەزىندە قولعا الماعان. سونىڭ سالدارىنان قاتاڭ كارانتين كەزىندە ءتارتىپ بۇزۋشىلىققا جول بەرىلدى. وسىعان بايلانىستى مينيستر قىزمەتتىك تەكسەرىس وتكىزۋدى تاپسىردى.
"ىشكى ىستەر ءمينيسترى ەرلان تۇرعىمبايەۆ اقتاۋ قالاسىنداعى جەرلەۋ راسىمىنە ادامداردىڭ كوپتەپ جينالۋىنا قاتىستى قىزمەتتىك تەرگەۋ شارالارىن وتكىزۋدى تاپسىردى" دەلىنگەن حابارلامادا.
ماڭعىستاۋ وبلىسىنىڭ باس مەملەكەتتىك سانيتار دارىگەردىڭ قاۋلىسى بويىنشا 3-17 تامىز ارالىعىندا قاتاڭ شەكتەۋ شارالارى ەنگىزىلگەن بولاتىن.
ايتا كەتەيىك، پوليسيا گەنەرال-مايورى، بقو پوليسيا دەپارتامەنتىنىڭ باسشىسى ماقسۇتحان ءابلازىموۆ پەن كاسىپكەر باحاريدين ءابلازىموۆتىڭ اناسى ءبيبىجامال ءابلازىموۆا 79 جاسىندا قايتىس بولعان. جەرلەۋ ءراسىمىنىڭ ۆيدەوسى الەۋمەتتىك جەلىدە كەڭىنەن تارادى. ۆيدەودان كارانتينگە قاراماستان جەرلەۋ راسىمىنە جۇزدەگەن قالا تۇرعىنى جينالعانىن كورۋگە بولادى. سونداي-اق ءتارتىپ ساقشىلارىنىڭ جولدى جاۋىپ تاستاۋى ادامداردىڭ نارازىلىعىن تۋدىرعان.
وقيعادان كەيىن اقتاۋلىق بەلسەندىلەر وبلىستىق پوليسيا دەپارتامەنتىنىڭ باستىعى گەنەرال-مايور جاناربەك باقتىبايەۆ پەن وبلىستىق دەنساۋلىق ساقتاۋ دارىگەرى ەرعالي سىدىمانوۆتىڭ وتستاۆكاعا كەتۋىن تالاپ ەتۋدە.
پىكىر قالدىرۋ