"امەريكانىڭ ەكى كەمەسىن تەڭىزگە باتىرۋ ءۇشىن جۇڭگو "كەمە ءولتىرۋشى" زىمىراندارىن ىسكە قوستى" دەپ حابارلادى لوندوندا شىعاتىن دەيلي ەكسپرەسس گازەتى.
باسىلىمنىڭ اپقاراتىنشا، بەيجىڭ اسكەري كۇشتەرى بالليستيكالىق زىمىراندارىن ىسكە قوسىپ، اقش-تىڭ "ەكى ۇشاق تاسىمالداۋشىسىن تەڭىزگە باتىرىپ" جىبەرەتىنىن مالىمدەگەن.
قىتايدىڭ جوعارى اسكەري شەنەۋنىگى، ادميرال لۋ ءيۋاننىڭ مالىمدەۋىنشە، قىتايدىڭ جاڭا جانە جوعارى قابىلەتتى "DF-26" كەمەگە قارسى زەنيتتىك بالليستيكالىق جانە كرۋيزدىك زىمىراندارى امەريكانىڭ كەز كەلگەن سوعىس كەمەلەرىن سۋعا باتىرىپ جىبەرەدى.
– امەريكا قۇراما شتاتتارى ەڭ كوپ قاۋىپتەنەتىن نارسە – شىعىندار... ءبىر سۋپەر تاسىمالداۋشىنى جوعالتۋ اقش-قا قىزمەت كورسەتەتىن 5000 ەر مەن ايەلدىڭ ومىرىنە ءقاۋىپ توندىرەدى. ەكەۋى باتىپ كەتسە، بۇل (شىعىن) ەكى ەسەگە ارتادى...امەريكانىڭ قالاي قورىققانىن كورەمىز، – دەگەن جۇڭگو شەنەۋنىگى.
اقپاراتتارعا سايكەس، "DF-26" ورتا جانە ءىرى كەمەلەردى جويىپ جىبەرۋگە قابىلەتتى. ول ءداستۇرلى جانە يادرولىق وقتۇمسىقتاردى الىپ جۇرە الادى.
ايتا كەتەيىك، وڭتۇستىك جۇڭگو تەڭىزى جانە تايۆان ماسەلەسى سوڭعى كەزدەردە جۇڭگو مەن اقش اراسىنداعى شيەلەنىس ايماعىنا اينالدى.
دۇيسەنبىدە تايۆان اۋە كۇشتەرى بۇعازداعى ورتا سىزىقتى كەسىپ وتكەن قىتايلىق جويعىش ۇشاقتارعا ەسكەرتۋ جاساعانىن مالىمدەدى. قىتايلىق ۇشاقتاردى زەنيتتى زىمىراندارمەن باقىلاعانىن حابارلاعان. ول كەزدە اقش دەنساۋلىق ساقتاۋ ءمينيسترى تايۆان پرەزيدەنتىمەن كەزىككەن.
وعان نارازىلىق تانىتقان بەيجىڭ "ءبىز امەريكاعا تاعى ءبىر رەت ەسكەرتەمىز، جۇڭگو اقش پەن تايۆاننىڭ كەز كەلگەن سىلتاۋمەن رەسمي قارىم-قاتىناس جاساۋىنا قارسى تۇرادى... وتپەن ويناعاندار كۇيىپ كەتەدى" دەپ مالىمدەگەن.
پىكىر قالدىرۋ