الماتى قالالىق ءبىلىم باسقارماسىنىڭ جالپى ورتا ءبىلىم بەرۋ ءبولىمىنىڭ باسشىسى اقمارال ايتۋاروۆا وقۋشىلارعا ونلاين ءبىلىم بەرۋ كەزىندە ءۇي تاپسىرماسى مەيلىنشە از بەرىلەتىنىن اتاپ ايتتى.

– وقۋشىلارعا ءۇي تاپسىرماسى مۇلدەم بەرىلمەيدى دەگەن ءسوز جوق. تاپسىرمانىڭ كولەمى مەيىلىنشە شەكتەلەدى. نەگىزى ساباقتا ورىنداعان ءجون. بۇل وقۋشى ءۇشىن دە، ءمۇعالىم ءۇشىن دە ءتيىمدى دەپ شەشتىك، – دەدى ول.

ول تامىز ايىندا 15 مىڭنان اسا ءمۇعالىمنىڭ Kundelik.kz، Bilimland.kz، Microsoft.Teams ءبىلىم بەرۋ پلاتفورمالارىن وقۋ پروسەسىندە قولدانۋ بويىنشا كۋرستان وتكەنىن اتاپ ءوتتى. 

ايتا كەتەيىك، ءبىلىم جانە عىلىم ءمينيسترى اسحات ايماعامبەتوۆ اتا-انالاردىڭ دەربەس شەشىمى بويىنشا كەزەكشى سىنىپتار ۇيىمداستىرىلاتىنىن ايتقان.

سونداي-اق ول قاشىقتان وقىتۋ بويىنشا ەكى نەگىزگى باعىتتى اتاپ ءوتتى:

• ارنايى ينتەرنەت-پلاتفورمالار ارقىلى وقىتۋ. پلاتفورمالاردىڭ ىڭعايىنا بايلانىستى مەكتەپتەر، قالالىق، اۋداندىق مەكتەپتەر ءبىلىم بولىمدەرى شەشىم قابىلدادى.
• "ەل ارنا" جانە "بالاپان" تەلەارنالارى ارقىلى بەرىلەتىن تەلەساباقتار، ءقازىر 9 ساعاتقا دەيىن ەفير بەرىلىپ وتىر

ونىڭ ايتۋىنشا، ساباق ۇزاقتىعى – 40 مينۋت. بالالار ءبىر كابينەتتە وقىتىلادى. سىنىپتاردا دەزينفەكسيالىق شارالار جۇرگىزىلەتىن بولادى