بۇكىل قازاقستان اۋماعىن قامتيتىن «قايىرىمدىلىق كەرۋەنى ءىىى» بايقاۋى بيىل 1 قازاندا باستاۋ الادى.

15 جەلتوقسانعا دەيىن جالعاساتىن كونكۋرس 5 اتالىم بويىنشا ۇزدىكتەردى انىقتاماق. بايقاۋ ق ر تۇڭعىش پرەزيدەنتى قورىنىڭ قازاقستان ىسكەر ايەلدەر قاۋىمداستىعىنىڭ، «حابار» اگەنتتىگى مەن «كتك» ارنالارىنىڭ قولداۋىمەن ءۇشىنشى جىل قاتارىنان ءوتىپ وتىر.

«ءسىز نەمەسە ءسىز بىلەتىن ادام جاقسى ءىس جاساسا، مۇقتاج ادامدارعا كومەكتەسسە نەمەسە قيىن جاعدايدا باتىلدىق تانىتسا، وندا بۇل بايقاۋ ءدال وسى ادامدارعا ارنالعان!»، دەلىنگەن حابارلامادا.

بايقاۋ لاۋرەاتتارى بەس نوميناسيا بويىنشا انىقتالادى:

- «اسار» - قايىرىمدىلىق قىزمەتى ۇلتتىق سالت-داستۇرلەرمەن بايلانىستى جانە ۇلتتىق مادەنيەتتى ساقتاۋعا كومەكتەسەتىندەر ءۇشىن؛

- «تۋعان جەر» - ءبىلىم بەرۋ، ەكولوگيا جانە اباتتاندىرۋ، مادەني نىسانداردى قالپىنا كەلتىرۋ جانە ت. ب. سالالاردا تۋعان ولكەسىنە قايىرىمدىلىق كومەك كورسەتەتىن ادامدارعا؛

- «باتىل جۇرەك» - ەرلىك پەن قايسارلىق ءۇشىن؛

- «مەيىرىم جولىندا» - بەلگىلى ءبىر ۋاقىت ارالىعىندا وتەۋسىز تۇراقتى كومەك كورسەتكەندەر ءۇشىن.

قاتىسۋعا وتىنىمدەر 1 قازانىنان 15 جەلتوقسانىنا دەيىنگى مەرزىمدە caravan_dobroty@fpp.kz ەلەكتروندى پوشتاسىنا جىبەرۋ قاجەت.

«كونكۋرستىڭ نەگىزگى ماقساتى – ىزگىلىكتى ناسيحاتتاۋ. ادامنان ادامنىڭ كومەك سۇراۋى وڭاي ەمەس. ءبىراق ، بىرەۋدىڭ كومەگىنە مۇقتاج جاندار جەتەرلىك. بۇل پاندەميادا انىق بايقالدى. ونداي ساتتەردە قولىن سوزۋعا دايىن جاندار قوعامدا بارشىلىق. ءبىزدىڭ مىندەت – سولاردى جارىققا شىعارۋ. ارينە، سىيلىق تا، ماراپاتتا بولادى»، – دەيدى الماتى قالاسى بويىنشا قايىرىمدىلىق كەرۋەنى جوباسىنىڭ جەتەكشىسى ءاليا سۇگىربايەۆا.