قازاقستاننىڭ تۇڭعىش پرەزيدەنتى نۇرسۇلتان نازاربايەۆ ەكس-بانكير مۇحتار ءابليازوۆقا قاتىستى پىكىر ءبىلدىردى. بۇل تۋرالى ول "شتريحي ك پورترەتۋ" دەرەكتى فيلمىندە ايتتى. 

– ماسەلەن، ءابليازوۆ ساتقىن ەمەس پە؟ مەن ونى جاس كەزىندە ەنەرگەتيكا ءمينيسترى قىزمەتىنە تاعايىندادىم. ال ول ۇرلىق جاسادى. تۇرمەگە وتىرعىزدىق. سول جەردەن تالاي رەت كەشىرۋىمدى ءوتىنىپ تۋىستارى مەن دوستارى حات جازدى، – دەيدى ول. 

ونىڭ ايتۋىنشا، ءبىرشاما ۋاقىتتان كەيىن مۇحتار ءابليازوۆقا راقىمشىلىق جاسالىپ، تۇرمەدەن شىعارىلعان. 

– ول ءالى دە تۇرمەدە وتىرا بەرۋشى ەدى. ءبىراق ول تۇرمەدەن شىققاننان كەيىن بانك باسشىلىعىنا قايتادان ورالۋدى سۇراندى. ال ول نە ىستەدى؟ 7،5 ميلليارد دوللاردى ۇرلاپ كەتتى. ەندى سول قارجىعا 15 جىل باتىستا تۇرىپ جاتىر. بۇدان باسقا قانداي اقشاعا كۇن كورەدى ول؟ ول جاقتا جۇمىس ىستەپ جۇرگەن جوق. جالاقى دا المايدى. ونىڭ ءبارى حالىقتىڭ اقشاسى.

مەملەكەت ادامداردىڭ اقشاسىن قايتارىپ بەردى. ءالى كۇنگە دەيىن سول اقشانى ىزدەپ جاتىرمىز. بىرتىندەپ ءبىز ميللياردتى قايتارۋدامىز.

اسىرەسە قازاقتىڭ بالاسىنا شەتەلدە ءومىر ءسۇرۋ وڭاي ەمەس. قازاق "وزگە ەلدە سۇلتان بولعانشا، ءوز ەلىڭدە ۇلتان بول" دەپ بەكەر ايتپاعان.

جارايدى، شەتەلدە 10 رەت مەيرامحاناعا بارارسىڭ، قىمبات كوستيۋم دە كيەرسىڭ، گامبۋرگەردى تويعانشا جەرسىڭ. ءبىراق ونىڭ ءبارى بوتەن نارسە عوي. تۋعان جەرىڭە، تۋعان ەلىڭە جەتپەيدى.

ارينە مەن ونى قىزعانبايمىن. ءبىراق بۇلاي بولعانى وتە وكىنىشتى.  ول جاقسى جۇمىس ىستەسە، وتانىنا پايداسىن تيگىزەر ەدى. ءبىراق قاشقىن بولىپ شىقتى، – دەپ اتاپ ءوتتى نازاربايەۆ.