ءماجىلىس دەپۋتاتى نۇرجان التايەۆ "Nur Otan" پارتياسى قاتارىنان شىعارىلىپ، دەپۋتاتتىق وكىلەتتىگى توقتاتىلدى. بۇل تۋرالى ورتالىق سايلاۋ كوميسسياسىنىڭ رەسمي سايتى حابارلادى.
"ق ر پارلامەنتى ءماجىلىسىنىڭ دەپۋتاتى نۇرجان باۋىرجان ۇلى التايەۆتىڭ وكىلەتتىگى ونىڭ "Nur Otan" پارتياسىنىڭ قاتارىنان شىعارىلعانى تۋرالى "Nur Otan" پارتياسى نۇر-سۇلتان قالاسى فيليالىنىڭ ساياسي كەڭەسى بيۋروسىنىڭ 2020 جىلعى 30 قاراشاداعى №1 قاۋلىسىنا بايلانىستى توقتاتىلسىن" دەلىنگەن رەسمي حابارلامادا.
ءماجىلىس دەپۋتاتى پاۆەل كازانسيەۆتىڭ ايتۋىنشا، "Nur Otan" بەدەلىن تۇسىرەتىن ءارى ونىڭ مۇددەسىنە نۇقسان كەلتىرەتىن ىس-ارەكەتتەر جاساعانى ءۇشىن ن. التايەۆتى پارتيا قاتارىنان شىعارۋدى "Nur Otan" پارتياسى نۇر-سۇلتان قالاسى فيليالىنىڭ ساياسي كەڭەسى بيۋروسىنا ۇسىنۋ شەشىمى ءبىراۋىزدان قابىلداندى.
– "Nur Otan" پارتيالىق باقىلاۋ كوميتەتىنىڭ وتىرىسى ءوتتى. وندا پارتيا مۇشەسى نۇرجان التايەۆتىڭ پارتيا جارعىسى مەن پارتيا مۇشەسىنىڭ ەتيكا كودەكسىن ساقتاۋى ماسەلەسى قارالدى، – دەپ جازدى ءماجىلىس دەپۋتاتى ءوزىنىڭ الەۋمەتتىك جەلىدەگى پاراقشاسىندا.
ەسكە سالا كەتەيىك، نۇرجان التايەۆ بىلتىر 13 اقپاندا پارلامەنت ءماجىلىسىنىڭ دەپۋتاتى بولعان. سول كەزدە ول پارلامەنتتىڭ تومەنگى پالاتاسىنىڭ اگرارلىق ماسەلەلەر كوميتەتىنىڭ قۇرامىنا كىرگەن.
پىكىر قالدىرۋ