ۇلتتىق بايقاۋشىعا سايلاۋ ۋچاسكەسىندە تىركەلۋ ءۇشىن نە قاجەت

 

سايلاۋدى بايقاۋ ءۇشىن جەكە تۇلعانى جىبەرگەن زاڭدى تۇلعانىڭ قۇجاتىنا وكىلەتتىگى ۇيىمنىڭ قۇرىلتاي قۇجاتتارىمەن، ۇيىم باسشىسىنىڭ وكىلەتتىك بەرۋ تۋرالى وكىمدىك قۇجاتتارىمەن نەمەسە ۇيىم اتىنان بەلگىلى ءبىر ىس-ارەكەتتەردى ورىنداۋعا سەنىمحاتتارمەن راستالاتىن زاڭدى تۇلعا قول قويۋعا ءتيىس. بۇل قۇجات بايقاۋشىنى جىبەرگەن ۇيىمنىڭ مورىمەن راستالادى جانە بايقاۋشىنىڭ جەكە باسىن كۋالاندىراتىن قۇجاتتى كورسەتكەن كەزدە جارامدى بولادى. بۇل رەتتە زاڭدى تۇلعا بەرەتىن قۇجات جەكە تۇلعاعا بەرىلەتىن وكىلەتتىكتەردىڭ شەكارالارىن (قانداي سايلاۋدى بايقاۋ ءۇشىن ۋاكىلەتتى تۇلعا جىبەرىلەدى؛ سايلاۋ ۋچاسكەسىن جانە ول جىبەرىلەتىن سايلاۋ كوميسسياسىنىڭ اتاۋىن كورسەتۋ)، وسى تۇلعا تۋرالى مالىمەتتەردى (تەگى، اتى جانە اكەسىنىڭ اتى) ناقتى ايقىنداۋعا، سونداي-اق وكىلەتتىكتەردى ورىنداۋعا كەدەرگى كەلتىرەتىن شەكتەۋلەردىڭ جوقتىعى تۋرالى جازبانى قامتۋعا ءتيىس.

 

زاڭدى تۇلعانىڭ بايقاۋشىنى جىبەرۋ سۋبەكتىسى رەتىندە قۇقىق قابىلەتتىلىگى ونىڭ تىركەلۋ فاكتىسىن انىقتاۋ ارقىلى راستالۋعا ءتيىس. ادىلەت مينيسترلىگى بەلگىلەگەن نىسان بويىنشا انىقتاما زاڭدى تۇلعانىڭ مەملەكەتتىك تىركەلۋىن (قايتا تىركەلۋىن) راستايتىن قۇجات بولىپ تابىلادى. زاڭدى تۇلعانىڭ مەملەكەتتىك تىركەلۋىن راستاۋمەن قاتار، ونىڭ قولدانىستاعى مارتەبەسى، ياعني قىزمەتىن توقتاتا تۇرۋدىڭ بولماۋى، تاراتۋ راسىمدەرىنىڭ باستالۋى فاكتىلەرىن بەلگىلەۋ تالاپ ەتىلەدى.

 

سايلاۋ پروسەسىنە قاتىسۋ، سايلاۋ ۋچاسكەلەرىندە بايقاۋ جانە تۇتاستاي العاندا ازاماتتاردىڭ ساياسي قۇقىقتارىن ىسكە اسىرۋ سالاسىنداعى قىزمەتتى جۇزەگە اسىرۋ جونىندەگى وكىلەتتىكتەر ۇيىم جارعىسىنىڭ كوشىرمەسىمەن راستالۋعا ءتيىس.