پرەزيدەنت قاسىم-جومارت توقايەۆ مەملەكەتتىك قىزمەت ىستەرى اگەنتتىگىنىڭ ءتوراعاسى انار جايىلعانوۆاعا ءبىرقاتار تاپسىرما بەردى. بۇل تۋرالى اقوردا سايتى حابارلادى.
اگەنتتىك ءتوراعاسى مەملەكەت باسشىسىنا 2021 جىلدىڭ باسىندا وتەتىن پرەزيدەنتتىك كادر رەزەرۆىنىڭ ەكىنشى ىرىكتەۋىنە دايىندىق جۇمىستارى تۋرالى اقپارات بەردى.
انار جايىلعانوۆانىڭ ايتۋىنشا، ىرىكتەۋدەن 50 ادام وتەدى. سونداي-اق ول ۇمىتكەرلەرگە قويىلاتىن كريتەرييلەر مەن بىلىكتىلىك تالاپتارىنىڭ كۇشەيتىلگەنىن اتاپ ايتتى.
رەزەرۆتى جاساقتاۋ كەزىندە قوعامدىق مۇددەلەردى نەگىزگە الاتىن تۇلعالارعا باسىمدىق بەرىلىپ، وزگەرىستەر جونىندە ناقتى تاجىريبەسى بار زاماناۋي باسشىلاردى انىقتاۋعا ءمان بەرىلەدى.
مەملەكەت باسشىسى ءوز سوزىندە ەڭ ۇزدىك ۇمىتكەرلەردى تاڭداۋ ءۇشىن ىرىكتەۋ جۇمىستارىن ساپالى ءارى اشىق وتكىزۋدىڭ ماڭىزدى ەكەنىن اتاپ ءوتتى.
سونىمەن قاتار اگەنتتىك ءتوراعاسى مەملەكەتتىك قىزمەتكە ىرىكتەۋ جۇيەسىن جەتىلدىرۋ ىسىنە دە توقتالدى.
ونىڭ ايتۋىنشا، وسى باعىت اياسىندا باسشىلىق جانە اتقارۋشىلىق قىزمەتتەرگە قويىلاتىن قۇزىرەتتەردى انىقتاۋ ءۇشىن تەستىلەۋ ەمەس، سۇحبات وتكىزۋ ۇسىنىلىپ وتىر. بۇل ىرىكتەۋدىڭ ساپاسىن ارتتىرۋعا مۇمكىندىك بەرەدى.
ول پرەزيدەنتكە مەملەكەتتىك اپپاراتتى قىسقارتۋ، مەملەكەتتىك ساياسي قىزمەتتى كاسىبيلەندىرۋ، مەملەكەتتىك باسقارۋ ۇدەرىسىن سيفرلاندىرۋ جونىندەگى جۇمىستار تۋرالى دا ايتتى.
كەزدەسۋ سوڭىندا قاسىم-جومارت توقايەۆ اگەنتتىك جۇمىسىنىڭ نەگىزگى باعىتتارى بويىنشا تاپسىرمالار بەردى.
پىكىر قالدىرۋ