پرەزيدەنت قاسىم-جومارت توقايەۆ "Artificial Intelligence Journey" ونلاين كونفەرەنسياسىندا ءسوز سويلەدى، دەپ حابارلادى اقوردا سايتى.

رەسمي سايتتىڭ مالىمدەۋىنشە، 90 ەلدەن 28 مىڭنان استام ادام قاتىسىپ، بۇل شارا الەم بويىنشا بيىلعى ەڭ ءىرى كونفەرەنسيالاردىڭ ءبىرى بولعان.

«Master event» جاساندى ينتەللەكت: بولاشاققا جاۋاپكەرشىلىكپەن قاراۋ» تاقىرىبىندا وتكەن پلەنارلىق تالقىلاۋعا مەملەكەت باسشىسىمەن قاتار رەسەي فەدەراسياسىنىڭ پرەزيدەنتى ۆلاديمير پۋتين قاتىستى. جيىنعا "سبەربانك" ب ا ق پرەزيدەنتى، باسقارما ءتوراعاسى گەرمان گرەف مودەراتورلىق ەتتى.

پرەزيدەنت ءوز سوزىندە الەم ەكونوميكا، قاۋىپسىزدىك، مەديسينا، ساياسات سياقتى ادام قىزمەتىنىڭ باعىتتارىن قامتيتىن جاساندى ينتەللەكت، ماشينا ارقىلى وقىتۋ جانە نەيروندىق جەلىلەر داۋىرىندە ءومىر ءسۇرىپ جاتقانىن اتاپ ءوتتى.

ونىڭ پىكىرىنشە، بۇل وزگەرىستەردى COVID-19 پاندەمياسى كەزىندە قاراپايىم ادامدار دا سەزىندى. 

– بۇل بىزگە مويىن بۇرۋعا مۇرشا بەرمەي، زاماناۋي تەحنولوگيالار جەتەكتەپ اپارا جاتقان مۇلدەم جاڭا الەم. ول جارقىن كەلەشەك پە، بۇلىڭعىر بولاشاق پا؟ كەلەشەك ۇرپاققا نە قالدىراتىنىمىز؟ بۇل ءبىزدىڭ – ينجەنەرلەردىڭ، IT- ماماندارىنىڭ، ەكونوميستەردىڭ، اسىرەسە، ساياساتكەرلەردىڭ جۇمىلعان كۇش-جىگەرىنە بايلانىستى، – دەيدى توقايەۆ.

مەملەكەت باسشىسى بۇگىنگى تاڭدا جاساندى ينتەللەكتىنىڭ كەسكىنىنە قاراپ-اق، اۋرۋدى انىقتاپ، دياگنوز قويۋعا، ادام ءومىرىن ساقتاپ قالۋعا مۇمكىندىك بەرەتىنىن ايتتى.

جاساندى ينتەللەكتىنىڭ قولدانىلۋى ءقاۋىپتى ينفەكسيالارى بار اۋرۋلاردىڭ كەلەسى تولقىنىن 18 اي بۇرىن انىقتاۋعا مۇمكىندىك جاسايدى. بۇل كۇردەلى جاعدايعا دايىندالۋ ءۇشىن ايتارلىقتاي ۋاقىت بەرەدى.

توقايەۆ قازاقستاننىڭ جاساندى ينتەللەكت تەحنولوگياسىن وركەندەتۋدى جانە ۇلكەن دەرەكتەرگە تالداۋ جاساۋدى دامۋدىڭ نەگىزگى باسىمدىقتارىنىڭ ءبىرى رەتىندە انىقتاعانىن جەتكىزدى.

ونىڭ ايتۋىنشا، گەوگرافيالىق تۇرعىدان ۇلكەن مەملەكەتتەرگە ەل ىشىندە "سيفرلىق تەڭسىزدىكتى" تومەندەتۋ جانە "سيفرلىق اگلومەراسيا" ماڭىزدى بولماق.