الماتى قالاسىندا قالا اكىمدىگىنىڭ قولداۋىمەن وڭىرلىك كوممۋنيكاسيالار قىزمەتىنىڭ ۇيىمداستىرۋىمەن فوتوكورمە وتۋدە. فوتوكورمەدە قالا تۇرعىندارىنىڭ جۇمىستارى قويىلعان.

شارانىڭ باستى ماقساتى — كوروناۆيرۋستىڭ بولۋى ىقتيمال جاڭا تولقىنى قارساڭىندا سانيتارلىق تالاپتاردى، اسىرەسە ماسكا تاعۋ رەجيمىن ۇستانۋدىڭ ماڭىزدىلىعىن، پاندەميامەن كۇرەستە الدىڭعى شەپتەن تابىلاتىن جانداردىڭ (مەديسينا قىزمەتكەرلەرى، ەپيدەميولوگتار، پوليسيا، ەرىكتىلەر جانە ت. ب.) جۇمىسىنىڭ قۇندىلىعىن تۇرعىنداردىڭ ەسىنە سالۋ.

وسى ماقساتتا كورمەگە جۇمىسىن ۇسىنعان «قازاق گازەتتەرى» پورتالىنىڭ رەداكتورى دوسجان بالابەك ۇلى ءوز پىكىرىمەن ءبولىستى: «بيىل كوروناۆيرۋس پاندەمياسى الەم حالقىنا توسىننان ۇلكەن سوققى جاسادى. جەر عالامشارىندا ءومىر ءسۇرىپ جاتقان بارلىق ادامزات ءۇشىن بۇل ۇلكەن قيىندىققا، قاسىرەتكە اكەلىپ سوقتىرعان الاپات سوعىسپەن تەڭ بولدى. قانشاما ادام ومىرىمەن قوشتاسىپ، قانشاما شاڭىراقتى استان-كەستەڭ ەتتى. ۆيرۋستىڭ ادام تاڭدامايتىنىن، ودان قۇتىلۋدىڭ ەڭ ءبىرىنشى جولى – قاتاڭ كارانتيندىك ەرەجەلەردى ساقتاۋ ەكەنىن ۇعىندىق»، — دەپ اتاپ ءوتتى دوسجان بالابەك ۇلى.

ول قالا تۇرعىندارى كۇندەلىكتى ومىرىندە بەتپەردە رەجيمىن تيىسىنشە ساقتاسا، ونىڭ ۆيرۋسقا توسقاۋىل بولاتىنىن ايتتى.

سونىمەن قاتار، پاندەمياعا بايلانىستى ازاماتتاردىڭ قاۋىپسىزدىك شارالارىن ۇستانۋعا بايلانىستى جاۋاپكەرشىلىكتى ارتتىرۋ كەرەكتىگىن اتاپ ءوتتى.

«ءقازىر الماتىدا بەتپەردە تاعىپ جۇرگەندەردى كەز-كەلگەن جەردەن كەزدەستىرەمىز. بۇل – جاۋاپكەرشىلىكتىڭ باستى بەلگىسى. تاقپايتىندار دا، سالعىرت قارايتىندار دا بار. قوعام بولعاننان كەيىن، بارلىعى دا ورىن الادى. ءبىز بەتپەردە تاعىپ جۇرگەن قالالىقتاردىڭ بەينەسى كوپكە ۇلگى بولسىن دەپ ءبىرقاتار سۋرەتتەر تۇسىردىك. ءوزىم تۇسىرگەن فوتوسۋرەتتەردە كارانتين جاعدايىندا ءومىر ءسۇرىپ جاتقان ورتانىڭ بۇگىنگى كەلبەتى كورىنىس تاپقان. ماقسات – وي سالۋ. ءبىز ءارقايسىسىمىز وسىلاي ءبىر عانا بەتپەردە رەجيمىن ساقتاي وتىرىپ، كوروناۆيرۋس پاندەمياسىن بىرگە جەڭەمىز دەپ ويلايمىن. ال بايقاۋ بويىنشا ۇسىنعان سۋرەتتەرىم الماتىنىڭ ءبىرقاتار جەرىنە ءىلىنىپتى، بارىپ تاماشالاۋعا بولادى»، — دەدى د. بالابەك ۇلى.

ەستەرىڭىزگە سالا كەتەيىك، فوتوكورمە 13-19 قاراشا ارالىعىندا وتۋدە. الماتىلىقتار جىبەرگەن فوتوسۋرەتتەر مەن گرافيكالىق كەسكىندەر ءىرى ساۋدا جانە ساۋدا ويىن-ساۋىق ورتالىقتارىندا، حالىققا قىزمەت كورسەتۋ ورتالىقتارىندا ورنالاستىرىلعان. سونداي-اق، قالانىڭ جارىقديودتى ەكراندارىنان دا كورۋگە بولادى.