الماتىدا جىل قورىتىندىسى بويىنشا جاقسى جانە قاناعاتتانارلىق جاعدايداعى جولداردىڭ ۇلەسى 80%-عا دەيىن جەتەتىن بولادى. بۇل تۋرالى قالا اكىمى باقىتجان ساعىنتايەۆ حابارلادى.

الماتى اكىمى باقىتجان ساعىنتايەۆ Instagram-داعى ءوزىنىڭ پاراقشاسىندا جول-كولىك ينفراقۇرىلىمىن سالۋ جانە جوندەۋ تۋرالى ايتتى.

«وتكەن جىلداعىداي جۇمىستىڭ باسىم بولىگى جاڭا الماتىدا جۇرگىزىلۋدە. قالانىڭ ىقشاماۋداندارىنا اينالعان بۇرىنعى اۋىلداردىڭ تۇرعىندارى جولدار مەن تروتۋارلاردىڭ جوقتىعى تۋرالى بىرنەشە رەت ماسەلە كوتەرگەن ەدى. ونى شەشۋدى وتكەن جىلى قولعا الدىق، ورتالىقتان الشاق جاتقان تۇرعىن ايماقتارىن ينفراقۇرىلىمدىق جاعىنان قايتا جاڭعىرتۋ ءۇشىن بيۋدجەتتى ناقتىلادىق جانە قارجى بولدىك»، — دەپ جازدى ب. ساعىنتايەۆ.

ونىڭ ايتۋىنشا، تاياۋداعى ەكى اپتا ىشىندە جول جوندەۋشىلەر اعىمداعى جىلعا جوسپارلانعان جۇمىس اۋقىمىن اياقتاۋلارى ءتيىس. وسىلايشا، مەگاپوليستەگى جاقسى جانە قاناعاتتانارلىق جاعدايداعى جولداردىڭ ۇلەسى 80%-عا دەيىن جەتەتىن بولادى.

ايتا كەتەرلىگى، 2020 جىلى ۇزىندىعى 200 شاقىرىم بولاتىن 283 كوشەگە ورتاشا جوندەۋ جۇمىستارى جۇرگىزىلدى، ونىڭ ىشىندە شەتكى ىقشاماۋداندارداعى 177 كوشە دە جوندەلدى. بۇگىنگى كۇنى 265 كوشە جوندەلدى، ال ۇزىندىعى 18 شاقىرىم بولاتىن 18 كوشەدە جوندەۋ جۇمىستارى جۇرۋدە.

بۇدان وزگە، اعىمداعى جىلى ۇزىندىعى 47،8 شاقىرىم بولاتىن 177 كوشەدە جاڭا جولدار سالىنۋدا. ۇزىندىعى 35 شاقىرىمدىق 144 كوشەدەگى جولداردىڭ قۇرىلىسى اياقتالدى. جىل سوڭىنا دەيىن ۇزىندىعى 12،8 شاقىرىم بولاتىن 33 كوشەگە جول سالۋ جۇمىستارىن اياقتاۋ جوسپارلانۋدا.

وجەت، ۇلجان-1، ۇلجان-2، شاڭىراق-2، ايگەرىم-1، ايگەرىم-2، دارحان-بايبەسىك، ترۋدوۆيك (توميريس)، العاباس-ازتم، جاس قانات، قاراسۋ، كوك-قاينار، اقبۇلاق، سايالى-2 ىقشامۋداندارىندا جاڭا جولدار سالىنۋدا. ونىڭ ىشىندە ايگەرىم-1، ايگەرىم-2، شاڭىراق-2، ۇلجان-1، دارحان — بايبەسىك ىقشاماۋداندارىنداعى جولدار پايدالانۋعا بەرىلدى. جالپى بۇلاردا 122 مىڭنان استام ادام تۇرادى.

سونىمەن قاتار، 2020 جىلى رىسقۇلوۆ داڭعىلى — ەمسوۆ كوشەسى، سەيفۋللين داڭعىلى — جانسۇگىروۆ كوشەسى، بۇقتىرما كوشەسى — قۇلجا تراكتى قيىلىستارىنداعى ءۇش جولايرىقتارىنىڭ قۇرىلىسى جالعاسۋدا. اباي داڭعىلى مەن سايىن كوشەسىندە ۇڭگىلەۋ جۇمىستارى جۇرۋدە. سولتۇستىك اينالىم كوشەسى — موسكۆين كوشەسىنىڭ سولتۇستىگى، سولتۇستىك اينالىم كوشەسى — جۇمابايەۆ كوشەسىنىڭ سولتۇستىگى، سولتۇستىك اينالىم كوشەسى — بورالداي كوشەسىنىڭ وڭتۇستىگى، مايلين كوشەسى — توقاي كوشەسى بويلارىندا جاياۋ جۇرگىنشىلەردىڭ جەر ءۇستى ءتورت وتپەلى جولدارىنىڭ قۇرىلىستارىن اياقتاۋ جوسپارلانۋدا.

ەسكە سالساق، بۇرىندارى الماتى اكىمى باقىتجان ساعىنتايەۆ جۇمىس ساپارى بارىسىندا جولداردىڭ، كولىك وتكىزگىشتەردىڭ، جول ايرىقتارىنىڭ قۇرىلىس الاڭدارىن ارالاپ، جۇمىس ساپاسىن قاتاڭ ساقتاۋدى جانە كورسەتىلگەن مەرزىمدە پايدالانۋعا بەرۋدى تاپسىرعان بولاتىن.