بەستاماق اۋىلىنداعى شوشقا فەرماسىنان اقتوبە وبلىسىنىڭ ەكولوگياسىنا كەلتىرىلگەن شىعىن 7،2 ميلليارد تەڭگەگە باعالاندى. شوشقا فەرماسىنا كورسەتىلگەن ايىپپۇلدى تولەۋگە ءبىر اي ۋاقىت بەرىلدى، دەپ حابارلادى "موي گورود" پورتالى. 

كاسىپورىندى تەكسەرۋ ناتيجەلەرى تۋرالى وبلىستىق ەكولوگيا دەپارتامەنتىنىڭ باسشىسى نۇرجان اققۇل حابارلاعانداي، "پاريجسكايا كوممۋنا 21" ج ش س كەنت ماڭىنداعى ترانشەيالاردا كومىلگەن وندىرىستىك جانە بيولوگيالىق قالدىقتاردىڭ اۋدانى 5،6 گەكتاردى قۇرادى.

– بۇل الاڭنىڭ لاستانۋىنا بايلانىستى شىعىن – 14 ميلليون تەڭگە. وسىعان بايلانىستى قىلمىستىق ءىس باستالدى. تەكسەرۋ بارىسىندا ترانشەيانىڭ ءبىر بولىگى قازىلىپ، سول جەردەن 189 توننا قالدىق شىعارىلدى، – دەدى نۇرجان اققۇل.

تەكسەرۋشىلەر انىقتاعانداي، جوبادا مالىمدەلگەن 40 مىڭ باس شوشقانىڭ ورنىنا فەرمادان 50 مىڭنان استام باس تابىلعان. ەكولوگيا دەپارتامەنتىنە سۇراتىلعان مالىمەتتەردى ۇسىنباعانى ءۇشىن دە اكىمشىلىك ءىس قوزعالدى.

– بارلىق كەلتىرىلگەن شىعىن 7 ميلليارد 27 ميلليون تەڭگەنى قۇرادى. ولار ءبىر اي ىشىندە وتەلمەسە ءبىز سوتقا جۇگىنەمىز. سونداي-اق، كاسىپورىنعا بۇزۋشىلىقتاردى تۇزەتۋ تۋرالى ۇيعارىم بەرىلدى، ەگەر ولار ورىندالماسا، سوت ارقىلى ونىڭ جۇمىسىن توقتاتا تۇرۋدى تالاپ ەتەمىز، – دەدى اقتوبە وبلىسىنىڭ باس ەكولوگى.

"پاريج كوممۋناسى 21" كاسىپورنىنىڭ جۇمىسى 2011 جىلدان بەرى تەكسەرىلمەگەنى انىقتالدى.

اقتوبە وبلىستىق ۆەتەرينارلىق ينسپەكسيا باسشىسى تەمىربەك ءنۇرتازيننىڭ اقپاراتى بويىنشا، شوشقانىڭ ءبىر باسىن سويعان كەزدە 8،5 كيلوگرامم قالدىق قالادى. بەستاماقتاعى شوشقا فەرماسىندا كۇنىنە 300 شوشقا سويىلعان، سوندىقتان كۇندەلىكتى قالدىقتاردىڭ كولەمى 2550 كيلوگرامدى قۇراعان.

بەستاماق اۋىلىنداعى شوشقا فەرماسىنا قاتىستى جانجال قاراشا ايىنىڭ ورتاسىندا ورشىگەن ەدى. جەرگىلىكتى تۇرعىندار اۋدانداعى ءيىس پەن كىردەن شارشاعان سوڭ شوشقا كەشەنىن جابۋدى تالاپ ەتكەن بولاتىن.