جوعارى وقۋ ورىندارىندا جەمقورلىق فاكتىلەرى بولماۋى قاجەت. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ اپپارات جينالىسىندا ايتتى.
– جوعارى وقۋ ورىندارىنداعى جەمقورلىق فاكتىلەرىنىڭ الدىن الۋ كەرەك. بۇل ماسەلەنى تۇبەگەيلى جويۋعا بولادى. ءبىراز ۋنيۆەرسيتەت ونى بۇگىن جويدى دەپ ايتا الامىز. كەي ۋنيۆەرسيتەتتەر بۇل ماسەلەدەن مۇلدە اۋلاق ءجۇر. سوندىقتان ۋنيۆەرسيتەتتىڭ باسشىسى قالاسا مۇنداي پروبلەمانى جويۋعا بولادى، – دەدى ايماعامبەتوۆ.
ونىڭ سوزىنشە جەمقورلىقتى جويۋ جوو-داعى قابىلدانعان ساياساتقا تىكەلەي بايلانىستى.
– ەگەر كەيبىر ۋنيۆەرسيتەت بۇل ماسەلەنى جويسا، بۇل ءىس باسقا ۋنيۆەرسيتەتتەردىڭ قولىنان كەلمەسە، وندا سۇراق پايدا بولادى. نەگە بىرەۋدىڭ قولىنان كەلەدى، باسقاسىنىڭ قولىنان كەلمەيدى؟ وسى فاكتىلەر بويىنشا ليسەنزيانى توقتاتۋعا ۇسىنىس بولدى. جەمقورلىق قايتالانعان جاعدايدا ءتيىستى باعىت بويىنشا ليسەنزيانى قايتارۋعا دەيىنگى نورمانى زەرتتەۋ كەرەك. ەگەر زاڭ جۇزىندە ورىندالاتىن، زەرتتەۋ بويىنشا دۇرىس شەشىم بولاتىن بولسا، ءبىز مۇنداي نورمانى قابىلداۋعا دايىنبىز. ويتكەنى ءقازىر جەمقورلىقتى جوو-دا جويۋ كەرەك دەپ ايتقانىما قانشا ۋاقىت بولدى. ءبىراق پروبلەما ءالى دە بار. ونى تۇبەگەيلى شەشۋىمىز كەرەك. جەمقورلىق بويىنشا جوو-نى انىقتالسا، ليسەنزيادان ايىرامىز. قاجەت بولسا مۇنداي شەشىمدى قابىلداۋعا دايىنبىز. بۇل وتە ماڭىزدى ماسەلە، – دەپ اتاپ ءوتتى مينيستر.
پىكىر قالدىرۋ