الماتى تاۋلارىنان تابىلعان ەر ادام ەرمان بايمەنوۆ قايتىس بولدى، دەپ حابارلادى توتەنشە جاعدايلار مينيسترلىگىنىڭ باسپا ءسوز قىزمەتى.
ۆەدومستۆو مالىمەتىنشە، قۇتقارۋشىلار ەرمان بايمەنوۆتى تاۋدان تاۋىپ، جەدەل جاردەمگە تابىستاعانشا بەس ساعات ۋاقىت كەتكەن. زارداپ شەككەن ادامنىڭ جاعدايى تابىلعان كەزدە وتە اۋىر بولعان.
– ساعات 20:45-تە رەسپۋبليكالىق جەدەل-قۇتقارۋ جاساعىنىڭ قۇتقارۋشىلارى زارداپ شەككەن 1985 جىلى تۋعان ەر ادامدى كۇمبەلسۋ وزەنىنىڭ كوپىرىندە كۇتىپ تۇرعان جەدەل مەديسينالىق كومەك بريگاداسى مەن اپاتتار مەديسيناسى ورتالىعىنىڭ قىزمەتكەرلەرىنە تاپسىردى. ەكىنشى ىزدەۋ-قۇتقارۋ توبىندا بولعان اپاتتار مەديسيناسى ورتالىعىنىڭ دارىگەرى ەر ادامنىڭ قايتىس بولعانىن انىقتادى، – دەدى توتەنشە جاعدايلار مينيسترلىگىنىڭ رەسمي وكىلى تالعات ءۋالي.
بۇعان دەيىن توتەنشە جاعدايلار مينيسترلىگىنىڭ باسپا ءسوز قىزمەتى 12 جەلتوقسان كۇنى تيتوۆ كولىنىڭ ماڭىندا ەر ادامنىڭ جوعالىپ كەتكەنى تۋرالى حابارلادى. ەكى تاۋلىك ىزدەۋدەن كەيىن 14 جەلتوقساندا ساعات 15:50-دە ەر ادام قۇمبەلسۋ وزەنىنىڭ شاتقالىنان تابىلدى. تابىلعان ۋاقىتتا ەر ادامنىڭ جاعدايى وتە اۋىر بولعان. تاۋلىكتىڭ قاراڭعى مەزىگىلى مەن تاۋ بەتكەيىنىڭ ءقاۋىپتى تىك بولۋىنا بايلانىستى ونى تاسىمالداۋ جۇمىسى قيىنداعان. ەر ادامدى قۇتقارۋ وپەراسياسىنا رەسپۋبليكالىق جەدەل-قۇتقارۋ جاساعىنىڭ 26 قۇتقارۋشىسى جۇمىلدىرىلدى. قۇتقارۋ جۇمىستارى بىرنەشە ساعاتقا سوزىلعان.
پىكىر قالدىرۋ