«Nur Otan» پارتياسىنىڭ رەسپۋبليكالىق سايلاۋالدى شتابى قاراعاندى وبلىسىنا باردى.
«ارسەلور ميتتال تەمىرتاۋ» مەتاللۋرگتارىمەن جانە «قازاقمىس»-قا قاراستى نۇرقازعان كەن بايىتۋ كومبيناتى جۇمىسشىلارىمەن بىرگە بيلەۋشى پارتيانىڭ سايلاۋالدى باعدارلاماسى اياسىندا ءوڭىردى ارى قاراي دامىتۋ جايى تالقىلاندى.
سونىمەن، تاياۋداعى 5 جىلدا وبلىستا كەمىندە 150 مىڭ جاڭا جۇمىس ورنىن اشۋ، 2،5 مىڭ كم اۆتوجول سالۋ جانە جوندەۋ، 176 اۋىلدىڭ تۇرعىندارىن ساپالى اۋىز سۋمەن قامتاماسىز ەتۋ جانە باسقا دا جوبالار جوسپارلانىپ وتىر.
«وزدەرىڭىز بىلەتىندەي، بىرنەشە كۇن بۇرىن مەملەكەت باسشىسى قاسىم-جومارت توقايەۆ قورشاعان ورتانى لاستاعانى ءۇشىن جاۋاپكەرشىلىكتى كۇشەيتۋدى كوزدەيتىن جاڭا ەكولوگيالىق كودەكسكە قول قويدى. ەكولوگيانى جاقسارتۋ ماقساتىندا «Nur Otan» پارتياسى وڭىردە 9 قوقىس سۇرىپتايتىن كەشەن سالۋدى جانە زياندى شىعارىندىلاردى كەمىندە 13%-كە ازايتا وتىرىپ، ونەركاسىپ كاسىپورىندارىن جاڭعىرتۋدى قامتاماسىز ەتۋدى مىندەت ەتىپ قويىپ وتىر»، - دەپ اتاپ ءوتتى كەزدەسۋ بارىسىندا سايلاۋالدى شتاب جەتەكشىسى باۋىرجان بايبەك.
وسى كۇنى پارتيا وكىلدەرى وتكەن جىلى اشىلعان «Global City» كوتەرمە-بولۋ ورتالىعىنىڭ بازاسىندا شاعىن جانە ورتا بيزنەس وكىلدەرىمەن كەزدەستى.
«ەلباسى، پارتيا ليدەرى نۇرسۇلتان نازاربايەۆتىڭ تاپسىرماسى بويىنشا سايلاۋالدى ۋادەلەرىمىز اياسىندا ءبىز سالىق سانىن قىسقارتىپ، ولاردى ەسەپتەۋ ءتارتىبىن وڭتايلاندىرۋدى، الەۋمەتتىك-ماڭىزدى تاۋار وندىرۋشىلەر ءۇشىن ققس-ىن تومەندەتۋدى، ەكونوميكانىڭ ناقتى سەكتورىن نەسيەلەندىرۋدى ۇلعايتۋعا جاعداي جاساۋدى نيەت ەتىپ وتىرمىز»، - دەدى پارتيا ءتوراعاسىنىڭ ءبىرىنشى ورىنباسارى.
بيزنەستى رۇقساتسىز تەكسەرۋلەردەن قورعاۋ ماقساتىندا سالىقتىق زاڭ بۇزۋشىلىقتار ءۇشىن قىلمىستىق جاۋاپكەرشىلىككە تارتۋ شەگىن قايتا قاراۋ جوسپارلانۋدا. سوت پەن پروكۋروردىڭ سانكسياسىنسىز كاسىپكەرلەرگە قاتىستى تەرگەۋ ارەكەتتەرىن جۇرگىزۋگە تىيىم سالىنادى.
جالپى، قولايلى ەكونوميكالىق ورتا قۇرۋ ءۇشىن مەملەكەتتىڭ ەكونوميكاداعى ۇلەسىن ازايتۋ، شاعىن جانە ورتا بيزنەسكە كەدەرگىلەردى جويۋ مىندەتى قويىلىپ وتىر. جەكە بيزنەس اشۋ ءۇشىن 50 مىڭ ازاماتقا ميكرونەسيە بەرىلەدى، ونىڭ ىشىندە جالپى سوماسى 250 ملرد. تەڭگە 42 مىڭ اۋىل تۇرعىنىنا ۇسىنىلادى. سونداي-اق، «قاراپايىم زاتتار ەكونوميكاسى» باعدارلاماسى اياسىندا حالىق تۇتىنۋ تاۋارلارىن وندىرۋشىلەرگە دە قولداۋ كورسەتىلەدى.
پىكىر قالدىرۋ