سەناتور اندرەي لۋكين لومباردتار مەن ميكروقارجى ۇيىمدارىنىڭ جۇمىسىنا قاتىستى ولقىلىقتارعا جانە قازىرگى نورمالاردىڭ دۇرىس ورىندالماۋىنا بايلانىستى ونداعان مىڭ قازاقستاندىقتىڭ زارداپ شەگىپ وتىرعانىن ايتىپ، الاڭداۋشىلىق ءبىلدىردى، دەپ حابارلادى پارلامەنتى سەناتىنىڭ باسپا ءسوز قىزمەتى.

وسىعان وراي، دەپۋتات قارجى نارىعىن رەتتەۋ جانە دامىتۋ اگەنتتىگىنە ساۋال جولداپ، قازىرگى تاڭدا لومباردتار ءوز جۇمىسىن باستاعانى تۋرالى مەملەكەتتىك ورگاندارعا ەسكەرتپەۋگە قۇقىلى ەكەنىن اتاپ ءوتتى. بۇل ولاردىڭ قىزمەتى اگەنتتىك تاراپىنان باقىلانىپ، رەتتەلمەيدى دەگەن ءسوز. وسىنداي لومباردتاردى تەكسەرۋ مۇمكىندىگىنىڭ جوقتىعىنا بايلانىستى ولارعا قاتىستى قاندايدا ءبىر اكىمشىلىك شارا قولدانۋ دا مۇمكىن ەمەس.

سونىمەن قاتار سەناتور مۇنداي قارجى ۇيىمدارىنىڭ قىزمەتىنە باقىلاۋ جۇرگىزۋگە مىندەتتى كەيبىر مەملەكەتتىك ورگاندار ەش ىس-ارەكەت جاساماي وتىرعانىن دا تىلگە تيەك ەتتى. مۇنىڭ ءبارى ءتۇرلى قارجى پيراميدالارىنىڭ پايدا بولۋىنا جول اشاتىنى ءسوزسىز.

– جەكەلەگەن قارجى ۇيىمدارىنىڭ سالدارىنان 17 مىڭداي ازامات زارداپ شەكتى. كەلتىرگەن شىعىن كولەمى 21 ملرد تەڭگەدەن استام. قازىرگى تاڭدا ەلىمىزدىڭ 14 وڭىرىندە الاياقتىققا جانە قارجى پيراميدالارىنا قاتىستى 32 قىلمىستىق ءىس تەرگەلۋدە. وسىعان دەيىنگى زاڭنامالارعا جۇرگىزىلگەن مونيتورينگ ناتيجەسىندە وكىلەتتى ورگاندار قابىلداعان ءبىرقاتار ايتارلىقتاي جەڭىلدىكتەر لومباردتاردىڭ ءتيىستى ورگاندار تاراپىنان باقىلاۋسىز جۇمىس ىستەۋىنە اكەلىپ سوقتىرعان. قازىرگى قالىپتاسىپ وتىرعان جاعدايدىڭ دا باستى سەبەبى وسى، – دەيدى سەنات دەپۋتاتى.

سوندىقتان اندرەي لۋكين ميكروقارجى ۇيىمدارىنىڭ قىزمەتىن باقىلاۋ ءۇشىن ءبىرىڭعاي اقپاراتتىق جۇيە قالىپتاستىرۋدىڭ ماڭىزى زور دەپ ەسەپتەيدى. سونداي-اق كەپىلگە قويىلعان مۇلىكتى ونىڭ يەسىنە اۆتوماتتى تۇردە ەسكەرتە وتىرىپ، جاريا ساۋدا وتكىزەتىن پلاتفورما قاجەت. تىركەلمەگەن بارلىق لومبارد زاڭدى تۇردە قايتادان قۇرىلۋعا نەمەسە مۇلدەم جابىلۋعا ءتيىس. ودان بولەك، دەپۋتاتتىق ساۋالدا زايم بەرگەن كەزدەگى كوميسسيا كولەمىن رەگلامەنتتەۋگە جانە قاۋىپسىزدىك پەن تەحنيكالىق جابدىقتاۋعا قويىلاتىن تالاپتارعا قاتىستى زاڭنامالاردى جەتىلدىرۋدىڭ ماڭىزدى ەكەنى ايتىلدى.