پرەزيدەنت قاسىم-جومارت توقايەۆ جوعارعى سوت ءتوراعاسى جاقىپ اسانوۆتى قابىلدادى، دەپ حابارلادى اقوردا سايتى.
جوعارعى سوت ءتوراعاسى 2021 جىلدىڭ 1 شىلدەسىنەن باستاپ اكىمشىلىك راسىمدىك-پروسەسسۋالدىق كودەكس قولدانىسقا ەنگەننەن كەيىن سوتتار مەملەكەتتىك قۇرىلىمدارعا قويىلاتىن تالاپتاردى الەمدىك اكىمشىلىك ادىلەت جۇيەسىنە سايكەس "مەملەكەتتىك ورگاننىڭ كىنالىلىك پرەزۋمپسياسى" پرينسيپىمەن قاراستىرا باستايتىنىن جەتكىزدى.
جاقىپ اسانوۆتىڭ ايتۋىنشا، شەتەلدىك تاجىريبە كورسەتكەندەي، اكىمشىلىك ادىلەت جۇيەسىن ەنگىزۋ مەملەكەتتىك اپپاراتتاعى ءتارتىپتى كۇشەيتۋگە، ينۆەستيسيالىق احۋالدى جاقسارتۋعا جانە ەكونوميكانىڭ وسۋىنە ىقپال ەتەدى.
توقايەۆ اتالعان كودەكس كۇشىنە ەنگەن كۇننەن باستاپ سوتتار جاڭارتىلعان الگوريتم نەگىزىندە، قازاقستاندىق سوت تورەلىگى ءۇشىن تىڭ ءتاسىل بويىنشا جۇمىس ىستەۋگە دايىن بولادى دەپ سەنەتىنىن ايتتى.
پرەزيدەنت ازاماتتاردىڭ جانە كاسىپكەرلەردىڭ قۇقىقتارى مەن مۇددەلەرىن قورعاۋ مەملەكەتتىڭ باستى مىندەتتەرىنىڭ ءبىرى ەكەنىن اتاپ ءوتتى.
پىكىر قالدىرۋ