قازاقستاننىڭ باس سانتار دارىگەرى ەرلان قياسوۆ ەلدە كارانتين شارالارى ءار ايماقتاعى ەپيدەميولوگيالىق احۋالدىڭ جاقسارعانىنا بايلانىستى جەڭىلدەيتىنىن ءمالىم ەتتى.

ونىڭ ايتۋىنشا، بۇعان دەيىن اۋرۋدىڭ ءورشۋى تۋرالى جاسالعان بولجام وزەكتىلىگىن جويعان جوق.

2021 جىلعى 18 قاڭتاردا جاسالعان بولجامدا 2021 جىلعى ناۋرىزدا كۇنىنە 3 مىڭعا دەيىن ادامنان كوروناۆيرۋس انىقتالۋى مۇمكىن ەكەنى حابارلانعان.

باس سانيتار اۋرۋدىڭ تارالۋى باقىلانعان تۇردە وسەتىنىن، الايدا بىلتىر جازداعى جاعدايدان اسپايتىنىن جەتكىزدى.

– بولجام قازىرگى شەكتەۋ شارالارىن ەسكەرە وتىرىپ جاسالعان بولاتىن. بۇگىنگى وڭ كورسەتكىشتەر، ەپيدەميولوگيالىق احۋال ناشار ايماقتاردا دەر كەزىندە قولعا الىنعان نىسانالى شارالارمەن بايلانىستى، –  دەدى ول.

ونىڭ ايتۋىنشا، ۇزاقمەرزىمدى بولجامدار اۋىق-اۋىق جاسالىپ تۇرادى.

دەنساۋلىق ساقتاۋ مينيسترلىگى مالىمەتىنشە، قازاقستاندا سوڭعى ءۇش كۇندە كوروناۆيرۋستىڭ تارالۋى باسەڭدەي تۇسكەن. 9 اقپانداعى اقپاراتتىق حابارلامادا ءبىر تاۋلىكتە ۆيرۋس انىقتالعان ادامدار سانى 1 مىڭنان ازايعانى ايتىلادى.

9 اقپانداعى مالىمەت بويىنشا،  26 380 ادام كورونوۆيرۋس ينفەكسياسىنان ەمدەلۋدە، ولاردىڭ ىشىندە 5 560 پاسيەنت ستاسيوناردا، 20 820 ناۋقاس امبۋلاتوريالىق دەڭگەيدە ەم قابىلداۋدا. ۆيرۋس جۇقتىرعاندار اراسىندا 261 ادامنىڭ جاعدايى اۋىر، 50 پاسيەنتتىڭ جاعدايى وتە اۋىر، 41 ناۋقاس ءوجج اپپاراتىندا جاتىر.