الاتاۋ ءداستۇرلى ونەر تەاترىنا باسشىلىق قىزمەتكە تاعايىندالعان ايتىسكەر اقىن رينات زايىتوۆ ءوزىن قۇتتىقتاپ جاتقاندارعا العىس بىلدىرە وتىرىپ، بۇل قىزمەتتى وزىنە ارتىلعان جاۋاپكەرشىلىك دەپ تۇسىنەتىنىن جەتكىزدى.
"جالعان سويلەپ، اقتالۋدان اۋلاقپىن. دەگەنمەن دە قايدا بارىپ، نە ىستەسەم دە بارلىعى اۋەلى جاراتۋشى، سونان سوڭ ومىرلىك تىلەكشىم، ساقتاۋشىم، جاناشىرىم دا حالىق بولعاندىقتان ءبىر اۋىز ءتۇسىندىرىپ وتەيىن. ادام ءبىر نارسەگە قابىلەتتى ەكەنىن كورسەتپەيىنشە، ەشكىمگە ەشتەڭەنى قۇر سوزبەن دالەلدەي المايتىنى ايدان انىق. سوندىقتان ماعان بەرىلگەن بۇل مۇمكىندىك ءبىرىنشى كەزەكتە وزىمە سىناق. ءۇش جۇزگە سويلەپ جۇرگەن اقىندارىڭىز ەكى ءجۇز ادامدى جۇمىلدىرىپ جۇمىس ىستەتە الماسا، ونىڭ پايداسى نە؟ وسى سوزبەن كەلىسەتىن شىعارسىزدار؟ ومىردەگى ەڭ ۇلكەن تىلەگىم ءوز ەلىمنىڭ ءبىر بۇرىشىندا قازاق ونەرىنە ادال قىزمەت ەتۋ عانا. ونى تالاي جەردە ايتىپ تا ءجۇردىم. مىنە سول تىلەگىمنىڭ العاشقى كۇنى بۇگىن ءوتتى. قۇتتىقتاۋ ارتىق. ساتتىلىك تىلەسەڭىزدەر، العىسىم شەكسىز. الماتى قالاسىنىڭ مادەنيەت باسقارماسىنىڭ باسشىلىعىنا سەنىم بىلدىرگەنىنە كوپ راحمەت. ازىرگە وسىلاي" دەلىنگەن رينات زايىتوۆتىڭ جەلىدەگى جازباسىندا.
پىكىر قالدىرۋ