پرەزيدەنت قاسىم-جومارت توقايەۆ اۋعانستان پرەزيدەنتى اشراف عانيمەن تەلەفون ارقىلى سويلەستى، دەپ حابارلادى اقوردا سايتى.
سايتتىڭ مالىمەتىنشە، اڭگىمەگە اۋعان تاراپى باستاماشىل بولعان. قازاقستان مەن اۋعانستان باسشىلارى ەكىجاقتى ىنتىماقتاستىقتىڭ قازىرگى احۋالى مەن كەلەشەك پەرسپەكتيۆالارىن تالقىلاعان.
اۋعانستان پرەزيدەنتى قازاقستاننىڭ اۋعان ىشىندەگى ديالوگتى تۇراقتى تۇردە قولداپ، ەلىمىزدىڭ كەڭ كولەمدە ەكونوميكالىق كومەك كورسەتىپ كەلە جاتقانى ءۇشىن العىس ايتتى. قاسىم-جومارت توقايەۆ ەلىمىزدىڭ اۋعانستانعا الداعى ۋاقىتتا دا جان-جاقتى قولداۋ كورسەتە بەرەتىنىن راستادى.
مەملەكەت باسشىسىنىڭ ايتۋىنشا، قازاقستان اۋعانستاننىڭ قاۋىپسىزدىگىن قامتاماسىز ەتۋ، ەكونوميكاسى مەن الەۋمەتتىك ينفراقۇرىلىمىن قايتا قالپىنا كەلتىرۋ جونىندەگى حالىقارالىق جانە ايماقتىق فورۋمداردىڭ جۇمىسىنا بەلسەندى تۇردە قاتىسادى.
قاسىم-جومارت توقايەۆ اۋعانستانمەن اراداعى جان-جاقتى بايلانىستاردى جانداندىرۋ ماقساتىندا ەرەكشە تاپسىرمالار بويىنشا ەلشى دارەجەسىندەگى ارنايى وكىل ينستيتۋتى قۇرىلعانىن اتاپ ءوتتى. وسى جىلدىڭ ءبىرىنشى جارتىسىندا قازاقستانعا ۇكىمەتتىك دەلەگاسيا كەلەدى. پرەزيدەنتتەر وسى كەزدەسۋ بارىسىندا ناقتى ماسەلەلەر مەن ىنتىماقتاستىقتىڭ باسقا دا باعىتتارى بويىنشا ديالوگتى ودان ءارى جالعاستىرۋ جونىندە ۋاعدالاستى.
قاسىم-جومارت توقايەۆ اشراف ءعانيدى ۇكىمەتتىك دەلەگاسيالار جاسايتىن كەلىسسوزدەردىڭ ناتيجەلەرىن بەكىتۋ جانە قازاقستان مەن اۋعانستان اراسىنداعى ءوزارا ءىس-قيمىلدىڭ كەلەشەگىن تالقىلاۋ ءۇشىن ەلىمىزگە رەسمي ساپارمەن كەلۋگە شاقىردى.
پىكىر قالدىرۋ