پرەزيدەنت قاسىم-جومارت توقايەۆ Samruk Business Forum وتاندىق تاۋار وندىرۋشىلەردى قولداۋ فورۋمىندا جەكەشەلەندىرۋدىڭ بارلىق پروسەسىنىڭ اشىق وتۋىنە ەرەكشە توقتالدى.
– جەكەشەلەندىرۋ مەملەكەتتىك مەنشىككە قاتىستى بولعاندىقتان ازاماتتارىمىز ونىڭ بارلىق شارتىن بىلۋگە قۇقىلى. قوعامدىق باقىلاۋ – جەكەشەلەندىرۋ پروسەسىنىڭ بارلىق كەزەڭىنىڭ ءتيىمدى ءارى اشىق ءوتۋىنىڭ پارمەندى قۇرالى. ۇكىمەت پەن قورعا ءتيىستى تاپسىرما بەرىلدى. قوردىڭ ءىرى كومپانيالارىنا قاتىستى ايتساق، "حالىقتىق IPO" ارقىلى جەكەشەلەندىرۋ وتە وزەكتى بولماق. ءوز قارجىسىن ءتيىمدى پايدالانعىسى كەلەتىن ەلىمىزدىڭ ءاربىر ازاماتى ۇلتتىق بايلىقتىڭ ءبىر بولىگىن يەلەنۋگە مۇمكىندىك الۋى ءتيىس، – دەدى مەملەكەت باسشىسى.
توقايەۆ تاعى ءبىر ماڭىزدى ماسەلە رەتىندە ەلىمىزدىڭ 2025 جىلعا دەيىنگى ۇلتتىق دامۋ جوسپارىنىڭ ماقسات-مىندەتتەرىنە سايكەس "سامۇرىق-قازىنانىڭ" باسىمدىقتارىن كەڭەيتۋ ماسەلەسىنە توقتالدى. قور مەن پورتفەلدى كومپانيالاردى دامىتۋ جوسپارى وسىعان سايكەس كەلۋى ءتيىس.
– قوردىڭ ينۆەستيسياسى دا ۇلتتىق ەكونوميكاعا باعىتتالۋى ءۇشىن ينۆەست-پورتفەلدەردى ءارتاراپتاندىرۋ ماڭىزدى. ۇلتتىق ءال-اۋقات قورى ءوزىنىڭ اتىنا ساي بولۋى كەرەك. مەنىڭ بۇعان كۇمانىم جوق. ەل ەكونوميكاسى ءۇشىن قوردىڭ وراسان زور ماڭىزىن ەسكەرە وتىرىپ، جالپىمەملەكەتتىك باسىمدىقتارعا قول جەتكىزۋ جولىندا ودان ءارى دايەكتى جۇمىس ىستەي بەرەدى دەپ سەنەمىن، – دەدى ول.
سونداي-اق فورۋم بارىسىندا "سامۇرىق-قازىنا" اق باسقارما ءتوراعاسى احمەتجان ەسىموۆ، "اق جول" پارتياسىنىڭ ءتوراعاسى ازات پەرۋاشيەۆ، قازاقستان ماشينا جاساۋشىلار وداعىنىڭ ءتوراعاسى مەيرام پىشەمبايەۆ ءسوز سويلەدى.
مەملەكەت باسشىسىنا ينۆەستيسيالىق باستامالار، قوردى ينۆەستيسيالىق حولدينگكە كەزەڭ-كەزەڭىمەن اينالدىرۋ جۇمىسىنىڭ بارىسى جانە "قازاقتەلەكوم" اكسيونەرلىك قوعامىنىڭ ءبىرقاتار سيفرلىق جوبالارى تانىستىرىلدى. فورۋم قورىتىندىسى بويىنشا ءبىرقاتار وفف-تەيك كەلىسىم-شارت پەن ستراتەگيالىق كەلىسىمگە قول قويىلدى.
پىكىر قالدىرۋ