ءماجىلىستىڭ جالپى وتىرىسىندا "Nur Otan" پارتياسى فراكسياسىنىڭ مۇشەلەرى ەرلان سايروۆ پەن ەلنۇر بەيسەنبايەۆ اۋىلداعى كەدەيلىك پەن ونى شەشۋ جولدارى ماسەلەلەرى تۋرالى ۇكىمەت باسشىسى اسقار مامينگە رەسمي ساۋال جولدادى.

"بۇل ماسەلەنى شەشۋدىڭ وڭتايلى ءادىسى ءال-اۋقاتى تومەن ازاماتتاردى ميكروكرەديتپەن قامتاماسىز ەتە وتىرىپ، ادامداردىڭ بيزنەس-ساۋاتىن ارتتىرۋ" دەگەن دەپۋتاتتار "ەڭبەك" باعدارلاماسىنىڭ نەسيەلەندىرۋ باعىتى بويىنشا بيىلعى جىلدىڭ بيۋدجەتى 20 ملرد تەڭگەنى قۇراپ وتىرعانىنا، شاعىن نەسيە الۋشىلاردىڭ سانى 5200-گە ازايعانىنا نازار اۋداردى.

– ميكروكرەديتتەۋدەگى باستى پروبلەما – كەپىلزات ماسەلەسى. بۇل پروبلەمانى نەسيەگە كەپىلدىك بەرۋ مەحانيزمىن ەنگىزۋ ارقىلى ناقتى شەشەتىن ۋاقىت جەتتى. بيىل اتامەكەن جانە جەرگىلىكتى اكىمدىكتەردىڭ قاتىسۋىمەن شاعىن نەسيە ۇيىمدارىن اشۋ جوسپارلانىپ وتىر. نيەت دۇرىس، ءبىراق ءوزىنىڭ تيىمدىلىگىن كورسەتە بىلگەن، وڭتايلى جۇمىس ىستەپ تۇرعان، 10 جىل شاعىن نەسيە بەرۋ تاجىريبەسى بار اۋىلشارۋاشىلىعىن قارجىلاي قولداۋ قورى نە سەبەپتى جابىلماق؟ مەملەكەت، قاراپايىم حالىق مۇددەسى تۇرعىسىنان قوردى ساقتاۋ قاجەت! ويتكەنى، وزدەرى قينالىپ وتىرعان اۋىلداعى ۇساق شارۋالار مەن ءزارۋ ادامدار قارجى كوزىنەن مۇلدەمگە قاعىلۋ ءقاۋپى باسىم، – دەدى دەپۋتتار.

"Nur Otan" پارتياسى فراكسياسىنىڭ مۇشەلەرى اۋىلدا ميكرو-بيزنەستى دامىتۋدىڭ باستى اسپەكتىسى – تۇتىنۋ جانە قىزمەت كورسەتۋ كووپەراتيۆتەرىن قۇرۋ دەپ سانايدى.

– حالىقارالىق تاجىريبەدە بۇل كووپەراتيۆتەر ءونىمدى وڭدەۋ، وتكىزۋگە كومەكتەسۋ، ۆەتەريناريا، مال ازىعىن دايىنداۋ بويىنشا قىزمەت كورسەتۋ، جاڭا تەحنولوگيا، جاڭا تۇقىمدار جونىندە ءبىلىم تاراتۋمەن اينالىسادى. وسىنداي كووپەراتيۆتەردى اسىرەسە شالعاي ەلدى مەكەندەردە قۇرۋ وتە وزەكتى. شالعاي ەلدى مەكەندەرگە ارزانداتىلعان ميكرو نەسيە جەتكىزۋدىڭ دە ينفراقۇرىلىمىن جاساۋ ماڭىزدى. بانكىلەر مەن ميكروكرەديت ۇيىمدارى قالا جانىنداعى ەلدى مەكەندەردى عانا قامتيدى. الىستاعى اۋىل ارزان نەسيەگە ءزارۋ، جەتكىزەتىن امال جوقتىڭ قاسى، – دەيدى ولار.