ۇلتتىق اكادەميالىق كىتاپحانادا مادەنيەت جانە سپورت مينيسترلىگىنىڭ ونلاين فورماتتا وتكەن كەڭەيتىلگەن القا ماجىلىسىندە پرەمەر-مينيستردىڭ ورىنباسارى ەرالى توعجانوۆ تاۋەلسىزدىكتىڭ 30 جىلدىعىن اتاپ ءوتۋ باعىتىندا ءبىرقاتار تاپسىرما بەردى.

– بيىل حالقىمىز ءۇشىن تاريحي ماڭىزدى جىل. ەل تاۋەلسىزدىگىنىڭ 30 جىلدىعىن اتاپ وتۋدەمىز. رەسپۋبليكا بويىنشا ەل مەرەيتويىنا ارنالعان 360-تان اسا مادەني، 400-گە جۋىق سپورت بويىنشا ءىس-شارا وتەدى دەپ جوسپارلانعان. مەملەكەت باسشىسىنىڭ تاپسىرماسىنا سايكەس بيىل ناۋرىز مەيرامى مازمۇندىق تۇرعىدان بايىتىلعان، جاڭارتىلعان كونسەپسيامەن اتاپ وتىلەدى.

جوسپارلانعان ءىس-شارالاردى جوعارى دەڭگەيدە ىسكە اسىرۋعا جۇمىلا كۇش سالىپ، تاۋەلسىزدىك جىلدارى قول جەتكىزگەن ناتيجەلەرىمىزدى ەل ىشىندە جانە حالىقارالىق دەڭگەيدە تاراتۋىمىز كەرەك، – دەدى پرەمەر-مينيستر ورىنباسارى.

سونداي-اق بيىل جىر الىبى جامبىل جابايەۆتىڭ 175، اعارتۋشى عالىم ىبىراي ءالتىنساريننىڭ 180، كۇش اتاسى قاجىمۇقان مۇڭايتپاس ۇلىنىڭ 150، الاش قايراتكەرى ءاليحان بوكەيحان ۇلىنىڭ 155، ەركەعالي راحمادييەۆتىڭ 90، ولجاس سۇلەيمەنوۆتىڭ 85، قارشىعا احمەدياروۆتىڭ 75، الىبەك دىنىشيەۆتىڭ 70، باتىرحان شۇكەنوۆتىڭ 60 جىلدىق مەرەيتويى مەملەكەتتىك دەڭگەيدە اتالىپ وتپەك.