مەملەكەت باسشىسى قاسىم-جومارت توقايەۆ رەسەي پرەزيدەنتى ۆلاديمير پۋتينمەن تەلەفون ارقىلى سويلەستى. بۇل تۋرالى اقوردا سايتى حابارلادى.
سايت مالىمەتىنشە، مەملەكەت باسشىلارى ەكىجاقتى ىنتىماقتاستىق پەن ەۋرازيالىق ەكونوميكالىق وداق اياسىنداعى ءوزارا ءىس-قيمىل ماسەلەلەرىن ەگجەي-تەگجەيلى تالقىلاعان.
"توقايەۆ ەكى ەلدىڭ پاندەمياعا قارسى كۇرەس جۇمىستارىنا وڭ باعاسىن بەردى. قاراعاندى قالاسىندا "سپۋتنيك V" ۆاكسيناسىنىڭ ءوندىرىسى ىسكە قوسىلدى. ەكى ەلدىڭ ۇكىمەتتەرى رەسەيلىك ۆاكسينانى قازاقستانعا جەتكىزۋ تۋرالى كەلىسىمگە كەلدى.
ءوزارا ۋاعدالاستىقتار مەن تاپسىرمالاردى ورىنداۋ ماقساتىندا ەكى ەل ۇكىمەتتەرى بىر-بىرىمەن تىعىز قارىم-قاتىناستا جۇمىس ىستەپ، ناقتى شەشىمدەر قابىلداپ جاتىر. بيىل كوكشەتاۋ قالاسىندا قازاقستان مەن رەسەيدىڭ ايماقارالىق ىنتىماقتاستىق فورۋمىن وتكىزۋ تۋرالى كەلىسىم جاسالدى. ال ونى وتكىزۋ فورماسىنا قاتىستى ناقتى شەشىم ەپيدەميالىق جاعدايعا بايلانىستى قابىلدانادى.
ۆلاديمير پۋتين قاسىم-جومارت توقايەۆتىڭ ەۋرازيالىق ەكونوميكالىق وداقتى ودان ءارى دامىتۋعا جانە ونىڭ الەۋەتى مەن بەدەلىن نىعايتۋعا قاتىستى بارلىق ۇسىنىستارىمەن كەلىستى. پرەزيدەنتتەر اتالعان ينتەگراسيالىق بىرلەستىكتىڭ قىزمەتىنە قاتىستى ماسەلەلەردى شەشۋ ءۇشىن ءوزارا تىعىز بايلانىستا جۇمىس ىستەۋگە ۋاعدالاستى" دەلىنگەن حابارلامادا.
تاراپتار حالىقارالىق نارىقتاعى بۇگىنگى ۇدەرىستەر مەن سىن-قاتەرلەردى ەسكەرە وتىرىپ، ەنەرگەتيكا سالاسىنداعى بىرلەسكەن جۇمىستاردى جالعاستىرۋعا كەلىستى.
مەملەكەت باسشىلارى ەكىجاقتى ىنتىماقتاستىق پەن ەۋرازيالىق ينتەگراسيانىڭ نەگىزگى پروبلەمالارىنا قاتىستى ەكى ەلدىڭ ۇستانىمدارى مەن كوزقاراستارىنىڭ سايكەس كەلەتىنىنە كوڭىلدەرى تولاتىنىن ايتتى.
پىكىر قالدىرۋ