ءۇيدى پەش جاعىپ، كومىرمەن جىلىتىپ وتىرعان الماتىلىق تۇرعىنداردىڭ ۋايىمى ءبىر – قىپ-قىزىل اقشاعا توننالاپ كومىر ءتۇسىرۋ. كومىر الۋعا قاجەت اقشادان بولەك، پەش جاعۋ كەزىندەگى ماشاقاتتى ايتساڭىزشى. پەش تۇتىندەپ، قاقاعان ايازدا ەسىك-تەرەزەنى اشىپ جەلدەتەتىن كەزدەر دە ءجيى بولادى. ال تۇتىندەپ جانعان پەش ادام ءومىرى ءۇشىن ءقاۋىپتى ەكەنى ايتپاسا دا تۇسىنىكتى. وسى ورايدا Halyk Bank جانە الماتى قالاسىنىڭ اكىمدىگى ازىرلەگەن بىرەگەي الەۋمەتتىك باعدارلامانىڭ ارقاسىندا 71 وتباسى وسى ماشاقاتتان قۇتىلدى.

جوبانىڭ ماقساتى ءبىرىنشى كەزەكتە تۇرعىن ءۇيدى گازداندىرۋعا مۇقتاج، الايدا قارجىلىق مۇمكىندىگى جوق حالىقتىڭ الەۋمەتتىك وسال توبىنا جاتاتىن ازاماتتاردى قولداۋ بولسا، ەكىنشى كەزەكتە الماتى قالاسى اۋا باسسەينىنىڭ جاعدايىن جاقسارتۋ. وسىلايشا، Halyk Bank قايىرىمدىلىق كومەك رەتىندە الماتىداعى 71 وشاقتى گازبەن قامتىسا، ەندى تاعى 21 ۇيگە تەگىن گاز قوسۋ جۇمىستارى ءجۇرىپ جاتىر.

قازىرگى ۋاقىتتا الاتاۋ اۋدانىنىڭ تۇرعىنى جاڭاباي قىپشاقبايەۆ 1989 جىلى كوشىپ كەلگەلى بەرى پەش جاعىپ وتىرمىز دەيدى.  بۇل وتباسى جىلىنا 8 تونناعا جۋىق كومىر جاعادى.

– 4 بالام بار. ۇيدە سەگىز ادام تۇرامىز. 2009 جىلدان بەرى مۇگەدەك بولىپ قالدىم. كوزىم كورمەيدى. 1 توپتاعى مۇگەدەكپىن. Halyk Bank-كە العىسىم شەكسىز. بارلىق جۇمىستى تەگىن اتقاردى. قىس تۇسكەندە دالاعا شىعىپ، كومىرىم جەتە مە، جەتپەي مە، نە ىستەسەك بولادى دەپ ويلانىپ ءجۇر ەدىم. بۇل ءبىر توسىنسىي بولدى، – دەيدى ۇيىنە كوگىلدىر وتىر كىرگىزىلگەن جانداردىڭ ءبىرى.

الماتىدا گاز جۇيەسىنە قوسىلۋعا مۇقتاج ۇيلەردىڭ كوبى قالانىڭ الاتاۋ جانە ناۋرىزباي اۋدانىندا ورنالاسقان. گازدى تەگىن قوستىرتىپ، جىلى ۇيدە وتىرعان گ.كاشييەۆا حانىم دا وسى الاتاۋ اۋدانىنىڭ تۇرعىنى.

– 6 بالام بار. ۇيدە ءبىر ادام عانا جۇمىس ىستەيتىندىكتەن گازدى ورناتۋعا جاعدايىمىز جەتپەدى. 1997 جىلدان بەرى وت جاعامىز. بۇرىن كومىردى دە، وتىندى دا ساتىپ الاتىنبىز. كوپبالالى انالاردىڭ جاعدايىن ويلاپ، بىزگە وسىلاي كومەكتەسىپ جاتقانى ءۇشىن حالىق بانكىنە راقمەتىمدى ايتامىن. بارلىقتارىڭىز باقىتتى بولىڭىزدار، – دەيدى كوپبالالى انا.

اتاۋلى جوبا 25 جىلدان استام ۋاقىت پەش جاعىپ وتىرعان جۇمابايەۆتار وتباسىن دا قۋانتتى. وتاعاسى جانە ونىڭ ءبىر ۇلى ءبىرىنشى توپ مۇگەدەگى. قارجىلاي مۇمكىندىك بولماعان سوڭ ءتىپتى ۇيگە گاز تارتۋدى ويلامادىق تا دەيدى ولار.

– ءبىزدىڭ ۇيگە جاڭا جىل قارساڭىندا گاز قوستى. جىلدىڭ باسىن وسىنداي تاماشا جاڭالىقپەن باستادىق. ءقازىر ءۇي جىپ-جىلى، قولىمىز تازا. بۇرىن وت جاعامىز دەپ قولىمىز كۇيە-كۇيە بولىپ ءجۇرۋشى ەدى، – دەيدى وتكەن كۇندەردى ەسكە العان جانار حانىم.