دەپۋتات ءنازيلا راززاقباي قىزى ايلىق جالاقىنىڭ تولەنبەۋىنە قاتىستى ۇكىمەت باسشىسى اسقار مامينگە ساۋال جولدادى.

– قازىرگى ۋاقىتتا ەڭبەك قۇقىقتارىنىڭ بۇزىلۋىنا، سونىڭ ىشىندە ايلىق جالاقىنىڭ تولەنبەۋىنە بايلانىستى شاعىمدار كوپ. مىسالى، "اتىراۋسترويپروەكت" جاۋاپكەرشىلىگى شەكتەۋلى سەرىكتەستىگىنىڭ جۇمىسشىلارىنا بەس اي بويى جالاقى تولەنبەگەن. وسىعان بايلانىستى ۇجىمدىق شاعىمعا اتىراۋ وبلىسىنىڭ ەڭبەك ينسپەكسياسى ءتيىستى تەكسەرۋ جۇرگىزۋدىڭ مۇمكىن ەمەستىگىن ايتىپ، جاۋاپ بەرگەن. وعان سەبەپ رەتىندە پرەزيدەنتتىڭ 2020 جىلعى 1ء-شى قاڭتاردان باستاپ شاعىن جانە ميكروكاسىپكەرلىك سۋبەكتىلەرىنە تەكسەرۋ، پروفيلاكتيكالىق باقىلاۋ جانە قاداعالاۋ جۇرگىزۋگە، سونداي-اق، پاندەمياعا قارسى شەكتەۋ شارالارىنا بايلانىستى موراتوريي ەنگىزۋ تۋرالى جارلىعىن العا تارتىپ وتىر.

قىزىلوردا وبلىسىندا دا ءدال وسىنداي جاعداي. اتالعان وبلىستىڭ ەڭبەك ينسپەكسياسى دا قولدانىستاعى موراتورييگە بايلانىستى “بادي-نۇر KZ” مەكەمەسىندە جۇمىس ىستەيتىن 20-دان استام ازاماتتىڭ ۇجىمدىق ءوتىنىشى بويىنشا تەكسەرۋ جۇرگىزۋدەن باس تارتقان. ولارعا 4 اي جالاقى تولەنبەگەن.

الايدا، جارلىققا سايكەس، حالىقتىڭ ءومىرى مەن دەنساۋلىعىنا، زاڭدىلىقتار مەن قوعامدىق تارتىپكە ءقاۋىپ ءتوندىرۋى مۇمكىن جاعدايلاردىڭ الدىن الۋعا نەمەسە جويۋعا باعىتتالعان تەكسەرۋلەر جۇرگىزۋگە بولادى.
ول ورتالىق مەملەكەتتىك نەمەسە جەرگىلىكتى اتقارۋشى ورگاننىڭ ءبىرىنشى باسشىسىنىڭ شەشىمى نەگىزىندە قولعا الىنادى، – دەدى ءنازيلا راززاقباي قىزى.

سوندىقتان، دەپۋتات ەڭ الدىمەن، ەڭبەك ۇجىمدارىندا الەۋمەتتىك تۇراقتىلىقتى قامتاماسىز ەتۋدىڭ ماڭىزدىلىعىن جانە جۇمىسكەرلەردىڭ ەلدىڭ كونستيتۋسياسى مەن زاڭدارىندا كەپىلدىك بەرىلگەن ەڭبەك قۇقىقتارىن ساقتاۋ بويىنشا ناقتى شارالار قابىلداۋدى اتاپ ايتتى.