ءماجىلىس دەپۋتاتى فاحرەددين قاراتايەۆ ۇكىمەت باسشىسى اسقار مامينگە جامبىل، قىزىلوردا وبلىستارىندا جانە پەتروپاۆل قالاسىندا بولعان قايعىلى وقيعالارعا قاتىستى دەپۋتاتتىق ساۋال جولدادى.
– "تاس تۇسكەن جەرىنە اۋىر" دەمەكشى، بۇل – بارشا قازاقستاندىقتىڭ قايعىسى. ءورت سالدارىنان جازىقسىز نارەستەلەرىنەن جانە ازاماتتارىنان ايىرىلىپ قالعان جاقىندارىنا دەپۋتاتتار اتىنان قايعىرىپ كوڭىل ايتامىز. "جازسىقسىز شەتىنەگەن بالالارىمىز بەن ازاماتتارىمىزدىڭ قاۋىپسىزدىگى ءۇشىن كىم جاۋاپتى؟" دەگەن سۇراق بارشامىزدى ويلاندىرادى. وسى وقيعا ءتيىستى جەرگىلىكتى اتقارۋشى ورگاندارعا ۇلكەن ساباق بولۋى قاجەت. ءبىزدىڭ تۇرعىندارىمىز قاشانعى وتتىڭ استىندا قالا بەرۋى كەرەك؟ بالالاردىڭ ءولىمى ءۇشىن كىم جاۋاپتى؟ ەرتەڭگى كۇنى بۇنداي جاعدايلارعا تاپ بولماۋىمىزعا كىم كەپىل؟ – دەدى فاحرەددين قاراتايەۆ.
دەپۋتاتتىڭ ايتۋىنشا، بۇل وقيعالار ەلدە تۇبەگەيلى شەشۋدى تالاپ ەتەتىن ماسەلەلەر كوپ ەكەنىن كورسەتكەن. بىلتىر ءتيىستى وكىلەتتىكتەرمەن جانە كادرلارمەن قامتاماسىز ەتىلگەن توتەنشە جاعدايلار مينيسترلىگى قايتا قۇرىلعان. الايدا ونىڭ اتقارعان جۇمىسى ءاردايىم ۋاقىتىلى جانە ءتيىمدى بولا بەرمەيدى.
– 2020 جىلدىڭ توعىز ايىندا ەلىمىزدە 9000-نان استام ءورت بولدى، 228 ادام قازا تاپتى، جاراقات العاندار – 217 ادام. توتەنشە جاعدايلار مينيسترلىگى قىس ماۋسىمىنا دايىندىق جۇمىستارى ءجۇرىپ جاتقاندىعى تۋرالى مالىمدەدى. ولاردىڭ مالىمەتتەرى بويىنشا، جۇمىستاردىڭ بارلىعى اياقتالىپ، كەمشىلىكتەردى جويۋ تۋرالى نۇسقاۋلار بەرىلگەن. الايدا، ورىن الىپ وتىرعان قايعىلى وقيعالار ىستەلىپ جاتقان پروفيلاكتيكالىق جۇمىستىڭ جەتكىلىكسىز ەكەندىگىن كورسەتتى، – دەيدى دەپۋتات.
وسىعان بايلانىستى دەپۋتاتتار جاڭاتاس، قىزىلوردا جانە پەتروپاۆلداعى وقيعالارعا قاتىستى جۇرگىزىلگەن تەرگەۋ ناتيجەلەرى بويىنشا كىنالى لاۋازىمدى تۇلعالارعا ەڭ قاتاڭ شارالار قابىلداپ جانە بۇل تۋرالى بۇقارالىق اقپارات قۇرالدارىنا اقپارات بەرۋدى جانە وسىنداي جاعدايلاردىڭ الدىن-الىپ ەرەكشە باقىلاۋعا الۋدى سۇرادى.
سونداي-اق توتەنشە جاعدايلار مينيسترلىك جەرگىلىكتى اكىمدىكتەرمەن بىرلەسىپ، پروفيلاكتيكالىق جۇمىستاردى، ءورت قاۋىپسىزدىگىن باقىلاۋ جانە الدىن الۋ شارالاردى كۇشەيتۋ جونىندەگى جۇيەلى جۇمىس جۇرگىزۋدى ۇسىنامىن.
پىكىر قالدىرۋ