2021 جىلدىڭ قىركۇيەك ايىنان باستاپ جوعارى وقۋ ورنىنداعى شتاتتاعى وقىتۋشى ايىنا كەم دەگەندە 200 مىڭ تەڭگە جالاقى الادى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ facebook پاراقشاسىندا جازدى.
"2019 جىلعى قىركۇيەكتە ءبىلىم جانە عىلىم مينيسترلىگىنە تىكەلەي باعىنىشتى جوعارى وقۋ ورىندارى وقىتۋشىلارىنىڭ جالاقىسى 20 پايىزعا، كەيىن 2020 جىلعى قىركۇيەك ايىندا تاعى 20 پايىزعا ۇلعايتىلدى. دەگەنمەن قابىلدانعان شارالارعا قاراماستان جالاقى كولەمىن ءالى دە ارتتىرۋ قاجەت. بۇل رەتتە، بولعان جالاقىنىڭ بازاسىنىڭ تومەن بولۋىنا بايلانىستى، ءتىپتى جالاقىنى 20-40 پايىزعا ۇلعايتۋ شارالارى دا جەتكىلىكسىز بولىپ وتىر.
2021 جىلدىڭ قىركۇيەگىنەن باستاپ ءبىلىم جانە عىلىم مينيسترلىگىنە ۆەدومستۆولىق باعىنىشتى جوعارى وقۋ ورنىندا شتاتتاعى وقىتۋشى ايىنا كەم دەگەندە 200 مىڭ تەڭگە، اعا وقىتۋشى – 230 مىڭ تەڭگە، قاۋىمداستىرىلعان پروفەسسور – 260 مىڭ تەڭگە؛ پروفەسسور 350 مىڭ تەڭگە (ۇلتتىق جوعارى وقۋ ورىندارىندا – 400 مىڭ تەڭگە) الۋى ءتيىس. بۇل جالاقىنىڭ ەڭ تومەنگى مولشەرى بولۋى ءتيىس. سونداي-اق ءار جوعارى وقۋ ورنى وقىتۋشىلاردىڭ بەلگىلى ءبىر جەتىستىكتەرى ءۇشىن باسقا دا ىنتالاندىرۋ تولەمدەرىن بەلگىلەپ، تولەي الادى، – دەپ جازدى مينيستر.
سونداي-اق پەداگوگيكالىق جۇكتەمەنىڭ ماكسيمالدى كولەمىن 1 ستاۆكا ءۇشىن 680 ساعاتتان اسىرماۋ كەرەگى تۋرالى شەشىم قابىلداندى.
– بۇل پەداگوگيكالىق جۇكتەمەسى اتالعان كورسەتكىشتەن تومەن جوعارى وقۋ ورىندارىن (جىلىنا 450 نەمەسە 500 ساعات) ەشتەڭەگە مىندەتتەمەيدى. ياعني، ساعات سانىن بەلگىلەنگەن 680-كە دەيىن جەتكىزۋ مىندەتى تۇرعان جوق. وقىتۋشىعا بەرىلگەن 1 ستاۆكا كولەمى 700-900 ساعات نەمەسە ودان جوعارى بولاتىن جوعارى وقۋ ورىندارى ساعات سانىن 680-كە دەيىن تومەندەتۋى كەرەك، – دەدى ول.
پىكىر قالدىرۋ