بۇگىن ءماجىلىس ءتوراعاسى نۇرلان نىعماتۋلين بۇكىلقىتايلىق حالىق وكىلدەرى جينالىسى تۇراقتى كوميتەتىنىڭ ءتوراعاسى لي چجانشۋمەن بەينەكونفەرەنسيا بايلانىسى ارقىلى كەزدەسۋ وتكىزدى، دەپ جازادى ءماجىلىستىڭ باسپا ءسوز قىزمەتى.

پالاتا سپيكەرى جۇڭگو حالىق رەسپۋبليكاسى قازاقستاننىڭ ماڭىزدى ستراتەگيالىق ارىپتەسى، دوس جانە تاتۋ كورشىسى ەكەنىن اتاپ ءوتىپ، ەكى ەل اراسىندا ديپلوماتيالىق قاتىناستار ورناعان 29 جىل ىشىندە سەنىمدى ساياسي ديالوگ، تەرەڭ ەكونوميكالىق بايلانىستار ورناپ، جان-جاقتى ىنتىماقتاستىقتىڭ بەلسەندى دامىعانىنا نازار اۋداردى.

كەزدەسۋ بارىسىندا نۇرلان نىعماتۋلين وسىنىڭ بارلىعى قوس مەملەكەت كوشباسشىلارىنىڭ دوستىعى مەن سەنىمدى قارىم-قاتىناسىنىڭ ارقاسىندا قول جەتكىزگەن جەتىستىكتەر ەكەنىنە توقتالىپ، ودان ءارى قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ مەملەكەتارالىق قاتىناستاردىڭ ستراتەگيالىق ارىپتەستىك دەڭگەيىنە جەتكىزۋ جولىنداعى ماڭىزدى ءرولىن اتاپ ءوتتى. سونداي-اق، ءماجىلىس ءتوراعاسى قازاقستاننىڭ قازىرگى پرەزيدەنتى قاسىم-جومارت توقايەۆتىڭ قىتايمەن ىنتىماقتاستىققا ۇلكەن ءمان بەرەتىنىن ايتتى.

ءوز كەزەگىندە، لي چجانشۋ قازاقستاننىڭ جاقىن دا شىنايى دوس مەملەكەت ەكەنىنە نازار اۋدارىپ، ەلدەر اراسىنداعى جوعارى ديپلوماتيالىق جانە ىنتىماقتاستىق بايلانىسقا كوڭىل ءبولدى. سونىمەن قاتار، لي چجانشۋ وتكەن جىل ەلدەر ءۇشىن كۇردەلى كەزەڭ بولعانىن اتاپ ءوتىپ، ىندەت ۋاقىتىندا جۇڭگو مەن قازاقستان اراسىندا كوروناۆيرۋسقا قارسى ءوزارا قولداۋ بەلسەندى جۇرگىزىلگەنىن ايتتى.

بۇكىلقىتايلىق حالىق وكىلدەرى جينالىسى تۇراقتى كوميتەتىنىڭ ءتوراعاسى قازاقستاننىڭ گۇلدەنۋىنە نيەتتەس بولا وتىرىپ، مەملەكەت باسشىلارىنىڭ ەلدى دامىتۋ جولىنداعى ايرىقشا ەڭبەكتەرىنە توقتالدى. سونداي-اق الدا قويعان مىندەتتەر مەن جوسپارلاردىڭ ءساتتى ورىندالىپ، قازاقستاننىڭ تابىستى 30 مەملەكەت قاتارىنا قوسىلاتىنا سەنىم ءبىلدىردى.

كەزدەسۋ بارىسىندا ءماجىلىس ءتوراعاسى كارانتين شارالارىنا قاتىستى قازاقستان-قىتاي شەكاراسىنداعى وتكىزۋ بەكەتتەر ارقىلى جۇكتەردى تاسىمالداۋدا قيىندىق بولعانىنا بايلانىستى اۆتوكولىك جانە تەمىرجول قاتىناستارىنىڭ ۇزدىكسىز جۇمىسىن قالپىنا كەلتىرۋ ءۇشىن قىتايدىڭ وتكىزۋ بەكەتتەرىندە، "ەكسپرەسس-دالىزدەر"، "جاسىل دالىزدەر" جانە جۇك تاسىمالىن ۇلعايتۋ ءۇشىن "تەمىر كەرۋەن" قۇرۋ جونىندەگى باستامانى ىسكە اسىرۋدى جالعاستىرۋعا قازاقستان دايىن ەكەنىن جەتكىزدى.

نۇرلان ءنىعماتۋليننىڭ پىكىرىنشە، بۇل پاندەميا جاعدايىندا ەۋرازيا قۇرلىعىنداعى "قىتاي-ەۋروپا" باعىتى بويىنشا تەمىرجول قاتىناسىن ودان ءارى دامىتۋ جولىمەن وڭىرلىك ەكونوميكالىق ينتەگراسيا شەڭبەرىندە قازاقستان-قىتاي ىنتىماقتاستىعىن نىعايتۋعا مۇمكىندىك بەرەدى.

سونىمەن قاتار، ءماجىلىس ءتوراعاسى كەزدەسۋدىڭ جۇڭگو كوممۋنيستىك پارتياسىنىڭ 100 جىلدىعى قارساڭىنا سايكەس كەلگەنىن العا تارتىپ، دوستاس جۇڭگو ەلىنە وركەنيەت پەن باق-بەرەكە تىلەدى.